ਰੂਸ ਵੱਲੋਂ ਯੂਕਰੇਨ ’ਤੇ ਅੱਧੀ ਰਾਤ ਨੂੰ ਮਿਜ਼ਾਈਲ ਤੇ ਡਰੋਨ ਹਮਲੇ ਕੀਤੇ ਗਏ, ਜਿਸ ਵਿੱਚ ਕੀਵ ਖੇਤਰ ’ਚ ਇਕ ਵਿਅਕਤੀ ਦੀ ਮੌਤ ਹੋ ਗਈ। ਖ਼ਬਰ ਏਜੰਸੀ ਰਾਇਟਰਜ਼ ਨੇ ਯੂਕਰੇਨੀ ਏਅਰ ਫੋਰਸ ਦੇ ਹਵਾਲੇ ਨਾਲ ਕਿਹਾ ਕਿ ਰੂਸ ਨੇ 50 ਮਿਜ਼ਾਈਲਾਂ ਤੇ 297 ਡਰੋਨ ਦਾਗੇ। ਏਅਰ ਫੋਰਸ ਨੇ ਟੈਲੀਗ੍ਰਾਮ ’ਤੇ ਪੋਸਟ ਵਿੱਚ ਕਿਹਾ ਕਿ ਹਵਾਈ ਰੱਖਿਆ ਯੂਨਿਟ ਨੇ ਇਨ੍ਹਾਂ ’ਚੋਂ 33 ਮਿਜ਼ਾਈਲਾਂ ਤੇ 274 ਡਰੋਨਾਂ ਨੂੰ ਫੁੰਡਿਆ। ਹਮਲੇ ਦੌਰਾਨ ਊਰਜਾ ਬੁਨਿਆਦੀ ਢਾਂਚੇ ਨੂੰ ਨਿਸ਼ਾਨਾ ਬਣਾਇਆ ਗਿਆ, ਜਿਸ ਕਰ ਕੇ ਯੂਕਰੇਨੀ ਅਵਾਮ ਸਰਦੀਆਂ ਦੇ ਮੌਸਮ ਵਿੱਚ ਬਿਨਾਂ ਬਿਜਲੀ ਤੇ ਹੀਟਿੰਗ ਤੋਂ ਰਹਿਣ ਲਈ ਮਜਬੂਰ ਹੈ।
ਯੂਕਰੇਨ ਦੀ ਐਮਰਜੈਂਸੀ ਸਰਵਿਸ ਨੇ ਕਿਹਾ ਕਿ ਹਮਲੇ ਕਰ ਕੇ ਨੁਕਸਾਨੀਆਂ ਇਮਾਰਤਾਂ ਦੇ ਮਲਬੇ ’ਚੋਂ ਬੱਚੇ ਸਣੇ ਅੱਠ ਵਿਅਕਤੀਆਂ ਨੂੰ ਸੁਰੱਖਿਅਤ ਬਾਹਰ ਕੱਢਿਆ ਗਿਆ ਹੈ। ਹਮਲੇ ਵਿਚ ਕੀਵ ਦੇ ਨੀਮ ਸ਼ਹਿਰੀ ਪੰਜ ਜ਼ਿਲ੍ਹਿਆਂ- ਓਬੁਖੀਵ, ਬ੍ਰੋਵੇਰੀ, ਬੋਰੀਸਪਿਲ, ਬੁਚਾ ਤੇ ਫਾਸਤੀਵ ਵਿੱਚ ਇਮਾਰਤਾਂ ਨੂੰ ਨੁਕਸਾਨ ਪੁੱਜਾ ਤੇ ਅੱਗ ਲੱਗ ਗਈ। ਫਾਸਤੀਵ ਜ਼ਿਲ੍ਹੇ ਦੇ ਪੁਤਰਿਵਕਾ ਪਿੰਡ ਵਿੱਚ ਮਲਬੇ ਹੇਠ ਦੱਬੇ ਲੋਕਾਂ ਨੂੰ ਕੱਢਣ ਲਈ ਰਾਹਤ ਤੇ ਬਚਾਅ ਕਾਰਜ ਜਾਰੀ ਹਨ। ਰੂਸ ਨੇ ਯੂਕਰੇਨ ਦੇ ਦੱਖਣੀ ਉਡੇਸਾ ਖਿੱਤੇ ਵਿੱਚ ਊਰਜਾ ਬੁਨਿਆਦੀ ਢਾਂਚੇ ਨੂੰ ਨਿਸ਼ਾਨਾ ਬਣਾਇਆ। ਹਮਲੇ ਕਰ ਕੇ ਅੱਗ ਲੱਗ ਗਈ ਜਿਸ ਨੂੰ ਕਾਫ਼ੀ ਮੁਸ਼ੱਕਤ ਨਾਲ ਬੁਝਾਇਆ ਗਿਆ। ਦੋਵਾਂ ਮੁਲਕਾਂ ਦਰਮਿਆਨ ਪਿਛਲੇ ਚਾਰ ਸਾਲਾਂ ਤੋਂ ਜਾਰੀ ਟਕਰਾਅ ਅਤੇ ਪਿਛਲੇ ਸਾਲ ਅਮਰੀਕਾ ਦੀ ਅਗਵਾਈ ਹੇਠ ਸ਼ੁਰੂ ਕੀਤੇ ਸ਼ਾਂਤੀ ਯਤਨਾਂ ਕਰ ਕੇ ਬਣੇ ਦਬਾਅ ਦੇ ਬਾਵਜੂਦ ਯੂਕਰੇਨੀ ਨਾਗਰਿਕਾਂ ਨੂੰ ਲਗਾਤਾਰ ਹਵਾਈ ਹਮਲਿਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
