ਸੁਪਰੀਮ ਕੋਰਟ ਨੇ ਵਾਤਾਵਰਨ ਕਾਰਕੁਨ ਸੋਨਮ ਵਾਂਗਚੁਕ(55) ਦੇ ਮਾਹਿਰ ਡਾਕਟਰ ਤੋਂ ਮੈਡੀਕਲ ਜਾਂਚ ਦੇ ਆਦੇਸ਼ ਦਿੱਤੇ ਹਨ। ਵਾਂਗਚੁਕ ਨੇ ਦੂਸ਼ਿਤ ਪਾਣੀ ਕਰਕੇ ਪੇਟ ਦੀਆਂ ਸਮੱਸਿਆਵਾਂ ਦੀ ਸ਼ਿਕਾਇਤ ਕੀਤੀ ਸੀ। ਵਾਂਗਚੁਕ ਕੌਮੀ ਸੁਰੱਖਿਆ ਐਕਟ ਤਹਿਤ ਜੋਧਪੁਰ ਦੀ ਕੇਂਦਰੀ ਜੇਲ੍ਹ ਵਿਚ ਨਜ਼ਰਬੰਦ ਹੈ। ਜਸਟਿਸ ਅਰਵਿੰਦ ਕੁਮਾਰ ਤੇ ਜਸਟਿਸ ਪੀ.ਬੀ.ਵਰਾਲੇ ਦੇ ਬੈਂਚ ਨੇ ਜੇਲ੍ਹ ਪ੍ਰਸ਼ਾਸਨ ਨੂੰ ਵਾਂਗਚੁਕ ਦੀ ਮੈਡੀਕਲ ਰਿਪੋਰਟ ਸੋਮਵਾਰ ਤੱਕ ਸੀਲਬੰਦ ਲਿਫਾਫੇ ਵਿਚ ਪੇਸ਼ ਕਰਨ ਦੇ ਹੁਕਮ ਦਿੱਤੇ ਹਨ।
ਸੁਣਵਾਈ ਦੌਰਾਨ ਵਾਂਗਚੁਕ ਦੀ ਪਤਨੀ ਗੀਤਾਂਜਲੀ ਐਂਗਮੋ ਵੱਲੋਂ ਪੇਸ਼ ਸੀਨੀਅਰ ਵਕੀਲ ਕਪਿਲ ਸਿੱਬਲ ਨੇ ਕੋਰਟ ਨੂੰ ਦੱਸਿਆ ਕਿ ਕਾਰਕੁਨ ਦੀ ਫੌਰੀ ਮੈਡੀਕਲ ਜਾਂਚ ਦੀ ਮੰਗ ਨੂੰ ਲੈ ਕੇ ਅਰਜ਼ੀ ਦਾਇਰ ਕੀਤੀ ਗਈ ਹੈ। ਸਿੱਬਲ ਨੇ ਦਾਅਵਾ ਕੀਤਾ, ‘‘ਪਾਣੀ ਕਰਕੇ ਕਾਰਕੁਨ ਨੂੰ ਪੇਟ ਦੀ ਸਮੱਸਿਆ ਹੈ। ਉਸ ਨੂੰ ਚੈਕਅੱਪ ਲਈ ਡਾਕਟਰ ਦੀ ਲੋੜ ਹੈ। ਪਰ ਕੋਈ ਨਹੀਂ ਆਇਆ। ਉਸ ਦਾ ਹਫ਼ਤੇ ’ਚ ਇਕ ਦਿਨ ਚੈਕਅੱਪ ਹੋਵੇ। ਤੇ ਉਸ ਨੂੰ ਸਾਡੇ ਵੱਲੋਂ ਮੁਹੱਈਆ ਪਾਣੀ ਦਿੱਤਾ ਜਾਵੇ।’’ ਹਾਲਾਂਕਿ ਰਾਜਸਥਾਨ ਸਰਕਾਰ ਵੱਲੋਂ ਪੇਸ਼ ਵਕੀਲ ਨੇ ਕਿਹਾ ਕਿ ਪਿਛਲੇ ਚਾਰ ਮਹੀਨਿਆਂ ਵਿੱਚ ਜੇਲ੍ਹ ਦੇ ਡਾਕਟਰ ਵੱਲੋਂ ਵਾਂਗਚੁਕ ਦੀ 21 ਵਾਰ ਜਾਂਚ ਕੀਤੀ ਗਈ ਹੈ। ਇਸ ’ਤੇ ਸਿਖਰਲੀ ਅਦਾਲਤ ਨੇ ਕਿਹਾ ਕਿ ਵਾਤਾਵਰਨ ਕਾਰਕੁਨ ਨੂੰ ਪੇਟ ਨਾਲ ਜੁੜ ਰੋਗਾਂ ਦੇ ਮਾਹਿਰ ਡਾਕਟਰ ਦੀ ਲੋੜ ਹੈ।ਇਸ ਦੌਰਾਨ ਵਾਂਗਚੁਕ ਨੇ ਵੀਰਵਾਰ ਨੂੰ ਸੁਪਰੀਮ ਕੋਰਟ ਵਿਚ ਇਨ੍ਹਾਂ ਦੋਸ਼ਾਂ ਤੋਂ ਇਨਕਾਰ ਕੀਤਾ ਕਿ ਉਸ ਨੇ ਸਰਕਾਰ ਨੂੰ ਅਰਬ ਸਪਰਿੰਗ ਵਾਂਗ ਉਖਾੜ ਸੁੱਟਣ ਦਾ ਬਿਆਨ ਦਿੱਤਾ ਸੀ। ਉਂਝ ਵਾਤਾਵਰਨ ਕਾਰਕੁਨ ਨੇ ਇਸ ਗੱਲ ‘ਤੇ ਜ਼ੋਰ ਦਿੱਤਾ ਕਿ ਉਸ ਨੂੰ ਆਲੋਚਨਾ ਅਤੇ ਵਿਰੋਧ ਕਰਨ ਦਾ ਜਮਹੂਰੀ ਅਧਿਕਾਰ ਹੈ। ਵਾਂਗਚੁਕ ਦੀ ਪਤਨੀ ਗੀਤਾਂਜੀ ਐਂਗਮੋ ਵੱਲੋਂ ਪੇਸ਼ ਸੀਨੀਅਰ ਵਕੀਲ ਕਪਿਲ ਸਿੱਬਲ ਨੇ ਦੋ ਮੈਂਬਰੀ ਬੈਂਚ ਨੂੰ ਦੱਸਿਆ ਕਿ ਪੁਲੀਸ ਨੇ ਹਿਰਾਸਤ ਵਿਚ ਲੈਣ ਵਾਲੀ ਅਧਿਕਾਰੀ ਨੂੰ ਗੁੰਮਰਾਹ ਕਰਨ ਲਈ ਇਕ ਚੋਣਵੇਂ ਵੀਡੀਓ ਨੂੰ ਅਧਾਰ ਬਣਾਇਆ ਹੈ। ਸਿੱਬਲ ਨੇ ਕਿਹਾ, ‘‘ਵੀਡੀਓ ਦੇਖੋ। ਪੁਲੀਸ ਮੁਤਾਬਕ ਉਹ(ਵਾਂਗਚੁਕ) ਇਹ ਕਹਿੰਦਾ ਹੈ ਕਿ ਜੇਕਰ ਭਾਰਤ ਸਰਕਾਰ ਰਾਜ ਦਾ ਦਰਜਾ ਨਹੀਂ ਦੇਵੇਗੀ, ਤਾਂ ਉਹ ਅਰਬ ਸਪਰਿੰਗ ਵਾਂਗ ਸਰਕਾਰ ਨੂੰ ਉਖਾੜ ਸੁੱਟੇਗਾ। ਪਰ ਉਸ ਨੇ ਅਜਿਹਾ ਕੁਝ ਨਹੀਂ ਕਿਹਾ। ਮੈਂ (ਵੀਡੀਓ ਦਾ ਟ੍ਰਾਂਸਕ੍ਰਿਪਸ਼ਨ) ਦੇਵਾਂਗਾ।’’ ਕਾਬਿਲੇਗੌਰ ਹੈ ਕਿ ਅਰਬ ਸਪਰਿੰਗ ਸਰਕਾਰ ਵਿਰੋਧੀ ਵਿਰੋਧ ਪ੍ਰਦਰਸ਼ਨਾਂ, ਵਿਦਰੋਹਾਂ ਅਤੇ ਹਥਿਆਰਬੰਦ ਵਿਦਰੋਹਾਂ ਦੀ ਇੱਕ ਲੜੀ ਹੈ ਜੋ 2010 ਅਤੇ 2018 ਦੇ ਆਸਪਾਸ ਮੱਧ ਪੂਰਬ ਅਤੇ ਉੱਤਰੀ ਅਫਰੀਕਾ ਵਿੱਚ ਫੈਲ ਗਈ ਸੀ।
