ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਅਮਰੀਕੀ ਸੰਸਦ ਦੇ ਸਾਂਝੇ ਸੈਸ਼ਨ ਨੂੰ ਸੰਬੋਧਨ ਕਰਦਿਆਂ ਆਪਣੀ ਵਿਆਪਕ ਟੈਰਿਫ ਨੀਤੀ ਦੀ ਜ਼ੋਰਦਾਰ ਢੰਗ ਨਾਲ ਵਕਾਲਤ ਕੀਤੀ ਹੈ। ਉਨ੍ਹਾਂ ਭਾਰਤ ਸਣੇ ਵੱਖ-ਵੱਖ ਮੁਲਕਾਂ ’ਤੇ ਲਾਏ ਟੈਰਿਫਾਂ ਨੂੰ ‘ਸ਼ਾਨਦਾਰ ਆਰਥਿਕ ਤਬਦੀਲੀ’ ਦੱਸਿਆ। ਉਨ੍ਹਾਂ ਸੁਪਰੀਮ ਕੋਰਟ ਦੇ ਹਾਲੀਆ ਫ਼ੈਸਲੇ ਨੂੰ ਮੰਦਭਾਗਾ ਦੱਸਦਿਆਂ ਇਸ ਦੀ ਰੱਜ ਕੇ ਨੁਕਤਾਚੀਨੀ ਕੀਤੀ। ਇਸ ਮੌਕੇ ਸਦਨ ਦੇ ਚੈਂਬਰ ਵਿੱਚ ਸੁਪਰੀਮ ਕੋਰਟ ਦੇ ਉਹ ਚਾਰ ਜੱਜ ਵੀ ਮੌਜੂਦ ਸਨ, ਜਿਨ੍ਹਾਂ ਟਰੰਪ ਦੀ ਟੈਰਿਫ ਨੀਤੀ ’ਤੇ ਰੋਕ ਲਾਈ ਸੀ।
‘ਸਟੇਟ ਆਫ ਦਿ ਯੂਨੀਅਨ ਅਡਰੈੱਸ’ ਦੌਰਾਨ ਟਰੰਪ ਨੇ ਵਪਾਰਕ ਟੈਕਸਾਂ ਨੂੰ ਆਪਣੇ ਪ੍ਰਸ਼ਾਸਨ ਦੀ ਆਰਥਿਕ ਰਣਨੀਤੀ ਦਾ ਕੇਂਦਰੀ ਥੰਮ੍ਹ ਦੱਸਿਆ। ਉਨ੍ਹਾਂ ਕਿਹਾ, ‘‘ਚਾਰ ਦਿਨ ਪਹਿਲਾਂ ਅਮਰੀਕੀ ਸੁਪਰੀਮ ਕੋਰਟ ਨੇ ਮੰਦਭਾਗਾ ਫ਼ੈਸਲਾ ਦਿੱਤਾ ਪਰ ਚੰਗੀ ਖ਼ਬਰ ਹੈ ਕਿ ਲਗਪਗ ਸਾਰੇ ਮੁਲਕ ਉਨ੍ਹਾਂ ਵਪਾਰਕ ਸਮਝੌਤਿਆਂ ’ਤੇ ਕਾਇਮ ਹਨ, ਜੋ ਉਨ੍ਹਾਂ ਨੇ ਪਹਿਲਾਂ ਹੀ ਕਰ ਲਏ ਹਨ। ਉਹ ਜਾਣਦੇ ਹਨ ਕਿ ਰਾਸ਼ਟਰਪਤੀ ਹੋਣ ਦੇ ਨਾਤੇ, ਮੇਰੇ ਕੋਲ ਨਵਾਂ ਸਮਝੌਤਾ ਕਰਨ ਦੀ ਕਾਨੂੰਨੀ ਸ਼ਕਤੀ ਹੈ, ਜੋ ਉਨ੍ਹਾਂ ਲਈ ਬਹੁਤ ਮਾੜੀ ਹੋ ਸਕਦੀ ਹੈ। ਇਸ ਲਈ, ਉਹ ਉਨ੍ਹਾਂ ਇਕਰਾਰਨਾਮਿਆਂ ’ਤੇ ਕੰਮ ਜਾਰੀ ਰੱਖਣਗੇ।’’ਉਨ੍ਹਾਂ ਕਿਹਾ ਕਿ ਸੁਪਰੀਮ ਕੋਰਟ ਦੇ ਫ਼ੈਸਲੇ ਤੋਂ ਪਹਿਲਾਂ ‘ਸਭ ਕੁਝ ਠੀਕ’ ਚੱਲ ਰਿਹਾ ਸੀ। ਹੁਣ ਉਹ ਦਰਾਮਦਾਂ ’ਤੇ ਟੈਕਸ ਲਾਉਣ ਲਈ ਬਦਲਵੇਂ ਕਾਨੂੰਨਾਂ ਦੀ ਵਰਤੋਂ ਕਰਨਗੇ। ਇਸ ਕਾਰਜ ਲਈ ਸਦਨ ਦੀ ਕਾਰਵਾਈ ਵੀ ਜ਼ਰੂਰੀ ਨਹੀਂ ਹੋਵੇਗੀ। ਉਨ੍ਹਾਂ ਪੇਸ਼ੀਨਗੋਈ ਕੀਤੀ ਕਿ ਕਿਸੇ ਦਿਨ ਟੈਰਿਫ ਆਧੁਨਿਕ ਆਮਦਨ ਟੈਕਸ ਪ੍ਰਣਾਲੀ ਦੀ ਥਾਂ ਲੈ ਲੈਣਗੇ। ਉਨ੍ਹਾਂ ਆਪਣਾ ਸੰਬੋਧਨ ਭਾਵੇਂ ਘਰੇਲੂ ਮੁੱਦਿਆਂ ਦੁਆਲੇ ਕੇਂਦਰਤ ਰੱਖਿਆ, ਪਰ ਉਨ੍ਹਾਂ ਆਪਣੀ ਵਿਦੇਸ਼ ਨੀਤੀ ਬਾਰੇ ਵੀ ਸੰਸਦ ਮੈਂਬਰਾਂ ਨੂੰ ਜਾਣੂ ਕਰਵਾਇਆ। ਉਨ੍ਹਾਂ ਗਾਜ਼ਾ ਵਿੱਚ ਗੋਲੀਬੰਦੀ ਸਮਝੌਤੇ, ਵੈਨੇਜ਼ੁਏਲਾ ਦੇ ਆਗੂ ਨਿਕੋਲਸ ਮਾਦੁਰੋ ਦਾ ਤਖ਼ਤਾ ਪਲਟ ਅਤੇ ਨਾਟੋ ਮੈਂਬਰਾਂ ’ਤੇ ਪਾਏ ਦਬਾਅ ਦਾ ਵੀ ਜ਼ਿਕਰ ਕੀਤਾ। ਉਨ੍ਹਾਂ ਮਹਿੰਗਾਈ ਤੇ ਸਿਹਤ ਸੰਭਾਲ ਖ਼ਰਚਾ ਵਧਣ ਲਈ ਆਪਣੇ ਤੋਂ ਪਹਿਲੇ ਰਾਸ਼ਟਰਪਤੀ ਜੋਅ ਬਾਇਡਨ ਤੇ ਡੈਮੋਕਰੈਟਿਕ ਕਾਨੂੰਨਸਾਜ਼ਾਂ ਸਿਰ ਦੋਸ਼ ਮੜ੍ਹਿਆ ਅਤੇਇਰਾਨ ਨੂੰ ਵੀ ਧਮਕੀ ਦਿੱਤੀ। ਅਮਰੀਕੀ ਸਦਰ ਨੇ ਕਿਹਾ, ‘‘ਮੈਂ ਮੱਧ-ਪੂਰਬ ਵਿੱਚ ਇਰਾਨ ਨਾਲ ਜਾਰੀ ਤਣਾਅ ਦੀ ਸਮੱਸਿਆ ਨੂੰ ਕੂਟਨੀਤੀ ਜ਼ਰੀਏ ਸੁਲਝਾਉਣਾ ਚਾਹੁੰਦਾ ਹਾਂ ਪਰ ਇਹ ਯਕੀਨੀ ਹੈ ਕਿ ਮੈਂ ਅਤਿਵਾਦ ਨੂੰ ਸਰਪ੍ਰਸਤੀ ਦੇਣ ਵਾਲੇ ਦੁਨੀਆ ਨੇ ਨੰਬਰ ਇਕ ਮੁਲਕ ਨੂੰ ਪਰਮਾਣੂ ਹਥਿਆਰ ਰੱਖਣ ਦੀ ਇਜਾਜ਼ਤ ਨਹੀਂ ਦੇਵਾਂਗਾ।’’
‘ਭਾਰਤ-ਪਾਕਿ ਜੰਗ ਨਾ ਰੋਕਦਾ ਤਾਂ ਸਾਢੇ ਤਿੰਨ ਕਰੋੜ ਲੋਕ ਮਾਰੇ ਜਾਂਦੇ’
ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਅਮਰੀਕੀ ਸੰਸਦ ਦੇ ਸਾਂਝੇ ਸੈਸ਼ਨ ਨੂੰ ਸੰਬੋਧਨ ਦੌਰਾਨ ਮੁੜ ਦਾਅਵਾ ਕੀਤਾ ਕਿ ਉਨ੍ਹਾਂ ਦੇ ਯਤਨਾਂ ਸਦਕਾ ਦੋ ਦੱਖਣ ਏਸ਼ਿਆਈ ਮੁਲਕਾਂ ਦਰਮਿਆਨ ਜੰਗ ਰੁਕ ਗਈ, ਜੋ ਪਰਮਾਣੂ ਜੰਗ ਵਿੱਚ ਤਬਦੀਲ ਹੋ ਸਕਦੀ ਸੀ। ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਸ਼ਹਿਬਾਜ਼ ਸ਼ਰੀਫ਼ ਨੇ ਉਨ੍ਹਾਂ ਨੂੰ ਕਿਹਾ ਕਿ ਜੇ ਉਹ ਵਿੱਚ ਨਾ ਪੈਂਦੇ ਤਾਂ ਦੋਵਾਂ ਮੁਲਕਾਂ ਦਰਮਿਆਨ ਟਕਰਾਅ ਕਰ ਕੇ ਸਾਢੇ ਤਿੰਨ ਕਰੋੜ ਲੋਕ ਮਾਰੇ ਜਾਂਦੇ। ਉਨ੍ਹਾਂ ਕਿਹਾ, ‘‘ਆਪਣੇ ਪਹਿਲੇ ਦਸ ਮਹੀਨਿਆਂ ਦੌਰਾਨ ਮੈਂ ਅੱਠ ਜੰਗਾਂ ਖ਼ਤਮ ਕੀਤੀਆਂ।’’ ਉਨ੍ਹਾਂ ਕੰਬੋਡੀਆ ਤੇ ਥਾਈਲੈਂਡ, ਮਿਸਰ ਤੇ ਇਥੋਪੀਆ, ਅਰਮੇਨੀਆ ਤੇ ਅਜ਼ਰਬਾਇਜਾਨ, ਕੌਂਗੋ ਤੇ ਰਵਾਂਡਾ ਅਤੇ ਗਾਜ਼ਾ ਜੰਗ ਦਾ ਵੀ ਜ਼ਿਕਰ ਕੀਤਾ।
ਹਾਦਸੇ ’ਚ ਜ਼ਖ਼ਮੀ ਬੱਚੀ ਦਾ ਸਨਮਾਨ
ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਸੰਬੋਧਨ ਦੌਰਾਨ ਇੱਕ ਛੋਟੀ ਕੁੜੀ ਨੂੰ ਸਨਮਾਨਿਤ ਕੀਤਾ। ਅਮਰੀਕਾ ਵਿੱਚ ਗ਼ੈਰ-ਕਾਨੂੰਨੀ ਢੰਗ ਨਾਲ ਰਹਿ ਰਹੇ ਭਾਰਤੀ ਟਰੱਕ ਡਰਾਈਵਰ ਦੀ ਗ਼ਲਤੀ ਕਾਰਨ ਹੋਏ ਸੜਕ ਹਾਦਸੇ ਵਿੱਚ ਇਸ ਲੜਕੀ ਨੂੰ ਗੰਭੀਰ ਸੱਟਾਂ ਲੱਗੀਆਂ ਸਨ। ਟਰੰਪ ਨੇ ਕਿਹਾ, ‘‘ਡੈਲਿਲਾ ਕੋਲਮਨ ਉਦੋਂ ਪੰਜ ਸਾਲ ਦੀ ਸੀ, ਜਦੋਂ ਜੂਨ 2024 ਵਿੱੱਚ 18-ਟਾਇਰੀ ਟਰੈਕਟਰ-ਟਰੇਲਰ ਨੇ ਉਸ ਦੀ ਖੜ੍ਹੀ ਕਾਰ ਨੂੰ ਟੱਕਰ ਮਾਰੀ। ਇਹ ਡਰਾਈਵਰ ਗ਼ੈਰ-ਕਾਨੂੰਨੀ ਏਲੀਅਨ ਸੀ, ਜਿਸ ਨੂੰ ਸਾਬਕਾ ਰਾਸ਼ਟਰਪਤੀ ਜੋਅ ਬਾਇਡਨ ਨੇ ਅਮਰੀਕਾ ’ਚ ਦਾਖ਼ਲ ਹੋਣ ਤੇ ਕਮਰਸ਼ੀਅਲ ਡਰਾਈਵਰ ਦਾ ਲਾਇਸੈਂਸ ਦਿੱਤਾ।’’ ਟਰੰਪ ਨੇ ਭਾਵੇਂ ਟਰੱਕ ਡਰਾਈਵਰ ਦੀ ਪਛਾਣ ਨਹੀਂ ਦੱਸੀ, ਪਰ ਪ੍ਰਤਾਪ ਸਿੰਘ, ਜੋ ਗ਼ੈਰ‘ਕਾਨੂੰਨੀ ਤਰੀਕੇ ਨਾਲ ਅਮਰੀਕਾ ਆਇਆ ਸੀ, ਨੂੰ ਉਪਰੋਕਤ ਹਾਦਸੇ ਲਈ ਗ੍ਰਿਫ਼ਤਾਰ ਕੀਤਾ ਗਿਆ ਸੀ।
