ਇਜ਼ਰਾਈਲ ਨੇ ਇਰਾਨ ਦੇ ਇੱਕ ਮੁੱਖ ਗੈਸ ਫੀਲਡ ‘ਤੇ ਹੋਰ ਹਮਲੇ ਨਾ ਕਰਨ ਦਾ ਵਾਅਦਾ ਕੀਤਾ ਹੈ, ਜਦਕਿ ਇਰਾਨ ਨੇ ਖਾੜੀ ਖੇਤਰ ਦੀਆਂ ਤੇਲ ਅਤੇ ਕੁਦਰਤੀ ਗੈਸ ਸਹੂਲਤਾਂ ‘ਤੇ ਹਮਲੇ ਤੇਜ਼ ਕਰ ਦਿੱਤੇ ਹਨ। ਇਨ੍ਹਾਂ ਹਮਲਿਆਂ ਨਾਲ ਵਿਸ਼ਵ ਊਰਜਾ ਬਾਜ਼ਾਰਾਂ ਅਤੇ ਗਲੋਬਲ ਆਰਥਿਕਤਾ ਨੂੰ ਵੱਡਾ ਝਟਕਾ ਲੱਗਾ ਹੈ।
ਹੋਰਮੁਜ਼ ਜਲਮਾਰਗ (Strait of Hormuz) ’ਤੇ ਇਰਾਨ ਦੇ ਕਬਜ਼ੇ ਕਾਰਨ ਵਿਸ਼ਵ ਦੀ ਬਾਲਣ ਸਪਲਾਈ ਪਹਿਲਾਂ ਹੀ ਦਬਾਅ ਹੇਠ ਸੀ ਅਤੇ ਹੁਣ ਇਨ੍ਹਾਂ ਹਮਲਿਆਂ ਨੇ ਕੀਮਤਾਂ ਨੂੰ ਹੋਰ ਉੱਪਰ ਚੁੱਕ ਦਿੱਤਾ ਹੈ। ਇਜ਼ਰਾਈਲੀ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨੇ ਵੀਰਵਾਰ ਦੇਰ ਰਾਤ ਦੱਸਿਆ ਕਿ ਰਾਸ਼ਟਰਪਤੀ ਡੋਨਲਡ ਟਰੰਪ ਦੀ ਬੇਨਤੀ ‘ਤੇ ਇਜ਼ਰਾਈਲ ਇਸ ਗੈਸ ਫੀਲਡ ‘ਤੇ ਕੋਈ ਹੋਰ ਹਮਲਾ ਨਹੀਂ ਕਰੇਗਾ। 28 ਫਰਵਰੀ ਨੂੰ ਜੰਗ ਸ਼ੁਰੂ ਹੋਣ ਤੋਂ ਬਾਅਦ ਇਰਾਨ ਦੇ ਚੋਟੀ ਦੇ ਆਗੂ ਮਾਰੇ ਗਏ ਹਨ ਅਤੇ ਭਾਵੇਂ ਇਰਾਨ ਦੀ ਫੌਜੀ ਸਮਰੱਥਾ ਘਟੀ ਹੈ, ਪਰ ਉਹ ਅਜੇ ਵੀ ਆਪਣੇ ਅਰਬ ਗੁਆਂਢੀ ਦੇਸ਼ਾਂ ‘ਤੇ ਮਿਜ਼ਾਈਲ ਅਤੇ ਡਰੋਨ ਹਮਲੇ ਕਰਨ ਦੇ ਸਮਰੱਥ ਹੈ।
ਇਸ ਖੇਤਰ ਵਿੱਚ ਸਮੁੰਦਰੀ ਜਹਾਜ਼ਾਂ ਅਤੇ ਸਾਊਦੀ ਅਰਬ ਦੀਆਂ ਰਿਫਾਇਨਰੀਆਂ ‘ਤੇ ਹੋਏ ਹਮਲਿਆਂ ਕਾਰਨ ਕੱਚੇ ਤੇਲ ਦੀ ਕੀਮਤ 119 ਡਾਲਰ ਪ੍ਰਤੀ ਬੈਰਲ ਤੱਕ ਪਹੁੰਚ ਗਈ ਹੈ, ਜੋ ਜੰਗ ਦੀ ਸ਼ੁਰੂਆਤ ਤੋਂ 60 ਫੀਸਦੀ ਤੋਂ ਵੱਧ ਦਾ ਵਾਧਾ ਹੈ। ਹਵਾਈ ਰੱਖਿਆ ਪ੍ਰਣਾਲੀ ਨੇ ਸ਼ਹਿਰ ਦੇ ਉੱਪਰ ਆਉਣ ਵਾਲੀ ਗੋਲੀਬਾਰੀ ਨੂੰ ਰੋਕਣ ਦੌਰਾਨ ਦੁਬੲੀ ਵਿੱਚ ਭਾਰੀ ਧਮਾਕੇ ਹੋਏ। ਇੱਥੇ ਲੋਕ ਰਮਜ਼ਾਨ ਦੇ ਪਵਿੱਤਰ ਮਹੀਨੇ ਦੇ ਅੰਤ ‘ਤੇ ਈਦ-ਉਲ-ਫਿਤਰ ਮਨਾ ਰਹੇ ਸਨ ਅਤੇ ਮਸਜਿਦਾਂ ਵਿੱਚ ਦਿਨ ਦੀ ਪਹਿਲੀ ਅਜ਼ਾਨ ਦਿੱਤੀ ਜਾ ਰਹੀ ਸੀ। ਬਹਿਰੀਨ ਦੇ ਗ੍ਰਹਿ ਮੰਤਰਾਲੇ ਨੇ ਕਿਹਾ ਕਿ ਰੋਕੇ ਗਏ ਇੱਕ ਗੋਲੇ ਦਾ ਟੁਕੜਾ ਗੋਦਾਮ ‘ਤੇ ਡਿੱਗਣ ਕਾਰਨ ਅੱਗ ਲੱਗ ਗਈ, ਅਤੇ ਸਊਦੀ ਅਰਬ ਨੇ ਆਪਣੇ ਤੇਲ ਨਾਲ ਭਰਪੂਰ ਪੂਰਬੀ ਸੂਬੇ ਨੂੰ ਨਿਸ਼ਾਨਾ ਬਣਾਉਣ ਵਾਲੇ ਕਈ ਡਰੋਨਾਂ ਨੂੰ ਮਾਰ ਸੁੱਟਣ ਦੀ ਰਿਪੋਰਟ ਦਿੱਤੀ ਹੈ। ਇਹ ਨਵੇਂ ਹਮਲੇ ਇੱਕ ਅਜਿਹੇ ਤਣਾਅਪੂਰਨ ਦਿਨ ਤੋਂ ਬਾਅਦ ਹੋਏ ਹਨ ਜਿਸ ਵਿੱਚ ਇਰਾਨ ਨੇ ਖੇਤਰ ਦੇ ਊਰਜਾ ਢਾਂਚੇ ‘ਤੇ ਹਮਲਾ ਕੀਤਾ ਸੀ ਅਤੇ ਸਾਊਥ ਪਾਰਸ ‘ਤੇ ਹੋਏ ਹਮਲੇ ਤੋਂ ਬਾਅਦ ਇਜ਼ਰਾਈਲ ‘ਤੇ ਦਰਜਨ ਤੋਂ ਵੱਧ ਮਿਜ਼ਾਈਲਾਂ ਛੱਡੀਆਂ ਸਨ। ਸਾਊਥ ਪਾਰਸ, ਜੋ ਦੁਨੀਆ ਦੇ ਸਭ ਤੋਂ ਵੱਡੇ ਗੈਸ ਖੇਤਰ ਦਾ ਇਰਾਨੀ ਹਿੱਸਾ ਹੈ, ਫਾਰਸ ਦੀ ਖਾੜੀ ਵਿੱਚ ਸਥਿਤ ਹੈ ਅਤੇ ਕਤਰ ਦੇ ਨਾਲ ਸਾਂਝੀ ਮਲਕੀਅਤ ਵਿੱਚ ਹੈ। ਇਰਾਨ ਵਿੱਚ ਪੈਦਾ ਹੋਣ ਵਾਲੀ ਲਗਪਗ 80 ਪ੍ਰਤੀਸ਼ਤ ਬਿਜਲੀ ਕੁਦਰਤੀ ਗੈਸ ਤੋਂ ਆਉਂਦੀ ਹੈ, ਇਸ ਲਈ ਇਸ ਹਮਲੇ ਨੇ ਦੇਸ਼ ਦੀ ਬਿਜਲੀ ਸਪਲਾਈ ਲਈ ਸਿੱਧਾ ਖ਼ਤਰਾ ਪੈਦਾ ਕਰ ਦਿੱਤਾ ਹੈ।
