ਭਾਰਤੀ ਮੂਲ ਦੇ ਫਾਈਨੈਂਸਰ ਨੂੰ ਕੈਲੀਫੋਰਨੀਆ ਵਿੱਚ 100 ਮਿਲੀਅਨ ਡਾਲਰ ਦਾ ਬੈਂਕ ਧੋਖਾਧੜੀ ਰੈਕੇਟ ਚਲਾਉਣ ਦੇ ਦੋਸ਼ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਮੁਲਜ਼ਮ ਐਸ਼ੋ-ਆਰਾਮ, ਖੌਫ਼ ਅਤੇ ਬਲੈਕਮੇਲਿੰਗ ਦੀ ਦੋਹਰੀ ਜ਼ਿੰਦਗੀ ਜੀ ਰਿਹਾ ਸੀ। ਉਹ ਸੈਕਸ ਵਰਕਰਾਂ ਨਾਲ ਪ੍ਰਾਈਵੇਟ ਪਾਰਟੀਆਂ ਦਾ ਆਯੋਜਨ ਕਰਦਾ ਸੀ ਅਤੇ ਬਾਅਦ ਵਿੱਚ ਇਨ੍ਹਾਂ ਪ੍ਰੋਗਰਾਮਾਂ ਵਿੱਚ ਸ਼ਾਮਲ ਹੋਣ ਵਾਲੇ ਲੋਕਾਂ ਨੂੰ ਬਲੈਕਮੇਲ ਕਰਨ ਲਈ ਇਸਤੇਮਾਲ ਕਰਦਾ ਸੀ।ਨਿਊਯਾਰਕ ਪੋਸਟ ਦੇ ਅਨੁਸਾਰ, 44 ਸਾਲਾ ਮਹਿੰਦਰ ਮਖੀਜਾਨੀ ਨੂੰ ਬੁੱਧਵਾਰ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ। ਹਥਿਆਰਬੰਦ ਸੰਘੀ ਏਜੰਟਾਂ ਨੇ ਕੈਲੀਫੋਰਨੀਆ ਦੇ ਨਿਊਪੋਰਟ ਬੀਚ ਸਥਿਤ ਇੱਕ ਪਾਸ਼ ਤੱਟਵਰਤੀ ਇਲਾਕੇ ‘ਕੋਰੋਨਾ ਡੇਲ ਮਾਰ’ ਵਿੱਚ ਉਸਦੀ ਆਲੀਸ਼ਾਨ ਹਵੇਲੀ ‘ਤੇ ਤੜਕਸਾਰ ਛਾਪਾ ਮਾਰਿਆ। ਹਥਕੜੀ ਲੱਗਣ ਤੋਂ ਬਾਅਦ ਉਸਨੂੰ ਪਜਾਮਾ ਪਹਿਨੇ ਹੋਏ ਹੀ ਜੇਲ੍ਹ ਲੈ ਜਾਇਆ ਗਿਆ। ਮਖੀਜਾਨੀ ‘ਤੇ ਬੈਂਕ ਧੋਖਾਧੜੀ ਦਾ ਦੋਸ਼ ਹੈ ਅਤੇ ਦੋਸ਼ੀ ਪਾਏ ਜਾਣ ‘ਤੇ ਉਸਨੂੰ 30 ਸਾਲ ਤੱਕ ਦੀ ਜੇਲ੍ਹ ਹੋ ਸਕਦੀ ਹੈ। ਕਿਵੇਂ ਦਿੱਤਾ 100 ਮਿਲੀਅਨ ਡਾਲਰ ਦੇ ਘੁਟਾਲੇ ਨੂੰ ਅੰਜ਼ਾਮ
ਮਖੀਜਾਨੀ ਨੇ ਰੀਅਲ ਐਸਟੇਟ ਦਸਤਾਵੇਜ਼ਾਂ ਵਿੱਚ ਹੇਰਾਫੇਰੀ ਕਰਕੇ ਅਤੇ ਬੈਂਕ ਵਿੱਚ ਗਿਰਵੀ ਰੱਖੀਆਂ ਗਈਆਂ ਜਾਇਦਾਦਾਂ ਦੀ ਕੀਮਤ ਵਧਾ ਕੇ ਇੱਕ ਸਥਾਨਕ ਬੈਂਕ ਨੂੰ ਲਗਪਗ 100 ਮਿਲੀਅਨ ਡਾਲਰ ਦਾ ਚੂਨਾ ਲਗਾਇਆ। ਇਹ ਰਕਮ ਅਜੇ ਤੱਕ ਬਰਾਮਦ ਨਹੀਂ ਹੋਈ ਹੈ।
ਇਸ ਘੁਟਾਲੇ ਨੂੰ ਅੰਜ਼ਾਮ ਦੇਣ ਲਈ ਉਸਨੇ ਨਿਊਪੋਰਟ ਬੀਚ ਸਥਿਤ ‘ਕੈਂਟਰ ਗਰੁੱਪ ਵੀ ਐਲਐਲਸੀ’ ਅਤੇ ਫਰਜ਼ੀ ਕੰਪਨੀਆਂ ਦੇ ਇੱਕ ਨੈੱਟਵਰਕ ਦਾ ਇਸਤੇਮਾਲ ਕੀਤਾ। ਉਸਨੇ ਅਤੇ ਉਸਦੇ ਇੱਕ ਮੁਲਾਜ਼ਮ ਨੇ ਅਡੋਬ ਸਾਫਟਵੇਅਰ ਦੀ ਵਰਤੋਂ ਕਰਕੇ ਸਤੰਬਰ 2024 ਤੋਂ ਅਪ੍ਰੈਲ 2025 ਵਿਚਕਾਰ ਟਾਈਟਲ ਇੰਸ਼ੋਰੈਂਸ ਰਿਕਾਰਡਾਂ ਵਿੱਚ ਬਦਲਾਅ ਕੀਤਾ, ਮੈਟਾਡੇਟਾ ਬਦਲਿਆ ਅਤੇ ਬੈਂਕ ਨੂੰ ਫਰਜ਼ੀ ਦਸਤਾਵੇਜ਼ ਸੌਂਪੇ। ਇਸ ਤੋਂ ਇਲਾਵਾ, ਕਾਲਾਂ ਅਤੇ ਸਪ੍ਰੈਡਸ਼ੀਟਾਂ ਰਾਹੀਂ ਵੀ ਬੈਂਕ ਅਧਿਕਾਰੀਆਂ ਨੂੰ ਲਗਾਤਾਰ ਗੁੰਮਰਾਹ ਕੀਤਾ ਗਿਆ।
ਸੈਕਸ ਵਰਕਰਜ਼, ਡਰੱਗਜ਼ optical_character_recognition ਅਤੇ ਬਲੈਕਮੇਲਿੰਗ ਦਾ ਖੇਡ
ਨਿਊਯਾਰਕ ਪੋਸਟ ਦੇ ਮੁਤਾਬਕ, ਮਖੀਜਾਨੀ ਦੇ ਖਿਲਾਫ ਦੋਸ਼ ਸਿਰਫ ਵਿੱਤੀ ਧੋਖਾਧੜੀ ਤੱਕ ਸੀਮਤ ਨਹੀਂ ਹਨ। ਅਦਾਲਤੀ ਦਸਤਾਵੇਜ਼ਾਂ ਅਤੇ ਗਵਾਹਾਂ ਦੇ ਬਿਆਨਾਂ ਤੋਂ ਪਤਾ ਲੱਗਾ ਹੈ ਕਿ ਉਹ ਡਰੱਗਜ਼ ਅਤੇ ਸੈਕਸ ਵਰਕਰਾਂ ਨਾਲ ਗੁਪਤ ਪਾਰਟੀਆਂ ਦਾ ਆਯੋਜਨ ਕਰਦਾ ਸੀ, ਜਿਨ੍ਹਾਂ ਵਿੱਚ ਬੈਂਕ ਦੇ ਕੁਝ ਕਰਮਚਾਰੀ ਵੀ ਸ਼ਾਮਲ ਹੁੰਦੇ ਸੀ।
ਇਸ ਤੋਂ ਬਾਅਦ ਉਹ ਇਨ੍ਹਾਂ ਪਾਰਟੀਆਂ ਵਿੱਚ ਹੋਏ ਘਟਨਾਕ੍ਰਮ ਦੀ ਜਾਣਕਾਰੀ ਦਾ ਇਸਤੇਮਾਲ ਕਰਕੇ ਕਰਮਚਾਰੀਆਂ ਅਤੇ ਆਪਣੇ ਸਹਿਯੋਗੀਆਂ ਨੂੰ ਬਲੈਕਮੇਲ ਕਰਦਾ ਸੀ ਤਾਂ ਜੋ ਉਨ੍ਹਾਂ ‘ਤੇ ਆਪਣਾ ਕੰਟਰੋਲ ਬਣਾਏ ਰੱਖ ਸਕੇ। ਉਸਨੇ ਆਪਣੇ ਕਰਮਚਾਰੀਆਂ ਨੂੰ ਜਾਨੋਂ ਮਾਰਨ, ਉਨ੍ਹਾਂ ਦੇ ਪਰਿਵਾਰ ਨੂੰ ਸੜਕ ‘ਤੇ ਲਿਆਉਣ ਅਤੇ ਬੱਚਿਆਂ ਨੂੰ ਸਰਕਾਰੀ ਖੈਰਾਤ ‘ਤੇ ਜਿਊਣ ਲਈ ਮਜਬੂਰ ਕਰਨ ਤੱਕ ਦੀਆਂ ਖੌਫਨਾਕ ਧਮਕੀਆਂ ਦਿੱਤੀਆਂ।
ਵਿਰੋਧੀਆਂ ‘ਤੇ ਕਰਵਾਇਆ ਹਮਲਾ
ਮਖੀਜਾਨੀ ਨੇ ਡਰਾਉਣ-ਧਮਕਾਉਣ ਅਤੇ ਹਿੰਸਾ ਦੇ ਜ਼ਰੀਏ ਆਪਣਾ ਪੂਰਾ ਆਪ੍ਰੇਸ਼ਨ ਚਲਾਇਆ। ਉਸਨੇ ਆਪਣੇ ਗੁੰਡਿਆਂ ਨੂੰ ਵਿਰੋਧੀਆਂ ਨੂੰ ਨਿਸ਼ਾਨਾ ਬਣਾਉਣ, ਉਨ੍ਹਾਂ ਦੇ ਕਾਰੋਬਾਰਾਂ ਵਿੱਚ ਤੋੜ-ਫੋੜ ਕਰਨ ਅਤੇ ਮੁਕਾਬਲੇਬਾਜ਼ਾਂ ‘ਤੇ ਦਬਾਅ ਬਣਾਉਣ ਦੇ ਨਿਰਦੇਸ਼ ਦਿੱਤੇ।
ਇੱਕ ਮਾਮਲੇ ਵਿੱਚ ਉਸਨੇ ਇੱਕ ਵਿਰੋਧੀ ਦੇ ਪਰਿਵਾਰਕ ਮੈਂਬਰਾਂ ਦੇ ਘਰਾਂ ‘ਤੇ ਬੇਦਖਲੀ ਦੇ ਨੋਟਿਸ ਲਗਾ ਦਿੱਤੇ ਅਤੇ ਇੱਕ ਵਿਰੋਧੀ ‘ਤੇ ਡਕੈਤੀ ਦਾ ਦੋਸ਼ ਲਗਾਉਣ ਲਈ ਜਨਤਕ ਹੋਰਡਿੰਗਜ਼ ਤੱਕ ਦਾ ਇਸਤੇਮਾਲ ਕੀਤਾ। ਵਕੀਲਾਂ ਵੱਲੋਂ ਪੇਸ਼ ਕੀਤੇ ਗਏ ਵੀਡੀਓ ਸਬੂਤਾਂ ਵਿੱਚ ਮਖੀਜਾਨੀ ਨੂੰ ਡਿਜ਼ਾਈਨਰ ਕੱਪੜੇ ਪਹਿਨੇ ਹੋਏ ਦੇਖਿਆ ਜਾ ਸਕਦਾ ਹੈ, ਜਿੱਥੇ ਉਹ ਸੁਰੱਖਿਆ ਗਾਰਡਾਂ ‘ਤੇ ਹਮਲੇ ਦੌਰਾਨ ਆਪਣੇ ਸਹਿਯੋਗੀਆਂ ਨੂੰ ਨਿਰਦੇਸ਼ ਦੇ ਰਿਹਾ ਹੈ, ਖਿੜਕੀਆਂ ਤੁੜਵਾ ਰਿਹਾ ਹੈ ਅਤੇ ਦਸਤਾਵੇਜ਼ ਖੋਹ ਰਿਹਾ ਹੈ।
ਕੌਣ ਹੈ ਮਹਿੰਦਰ ਮਖੀਜਾਨੀ
ਮਖੀਜਾਨੀ ਬੇਹੱਦ ਆਲੀਸ਼ਾਨ ਜ਼ਿੰਦਗੀ ਜਿਊਂਦਾ ਸੀ। ਉਹ ਪ੍ਰਾਈਵੇਟ ਜੈੱਟ ਰਾਹੀਂ ਸਫ਼ਰ ਕਰਦਾ ਸੀ, ਮਹਿੰਗੇ ਡਿਜ਼ਾਈਨਰ ਕੱਪੜੇ ਪਹਿਨਦਾ ਸੀ ਅਤੇ ਉਸਦੇ ਕੋਲ ਬੈਂਟਲੇ, ਪੋਰਸ਼ੇ ਅਤੇ ਮਰਸਡੀਜ਼ ਜੀ-ਵੈਗਨ ਵਰਗੀਆਂ ਕਈ ਲਗਜ਼ਰੀ ਕਾਰਾਂ ਸਨ। ਉਸਨੇ ਨਾਲੋ-ਨਾਲ ਦੋ ਵੱਡੀਆਂ ਹਵੇਲੀਆਂ ਲੈ ਰੱਖੀਆਂ ਸਨ, ਜਿਨ੍ਹਾਂ ਵਿੱਚੋਂ ਇੱਕ ਸਿਰਫ ਉਸਦੇ ਸਹੁਰੇ ਪਰਿਵਾਰ ਲਈ ਰਿਜ਼ਰਵ ਸੀ।
ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਮਖੀਜਾਨੀ ਕੋਲ ਬੇਅੰਤ ਸੰਪਤੀ ਹੈ, ਪਰ ਸਰਕਾਰ ਅਜੇ ਤੱਕ ਇਸਦਾ ਪੂਰੀ ਤਰ੍ਹਾਂ ਪਤਾ ਨਹੀਂ ਲਗਾ ਸਕੀ। ਸ਼ਿਕਾਇਤ ਵਿੱਚ ਕਿਹਾ ਗਿਆ ਹੈ ਕਿ ਇਹ ਸੰਪਤੀ ਲਗਭਗ ਪੱਕੇ ਤੌਰ ‘ਤੇ ਮਖੀਜਾਨੀ ਦੇ ਆਪਣੇ ਨਾਮ ‘ਤੇ ਦਰਜ ਨਹੀਂ ਹੈ।
ਭਾਰਤ ਭੱਜਣ ਦੀ ਫਿਰਾਕ ‘ਚ ਸੀ ਮੁਲਜ਼ਮ
ਇਹ ਮਾਮਲਾ ‘ਹੋਟਲ ਲਾਗੁਨਾ’ ਨਾਲ ਜੁੜੇ ਇੱਕ ਲੰਬੇ ਵਪਾਰਕ ਵਿਵਾਦ ਨਾਲ ਵੀ ਮੇਲ ਖਾਂਦਾ ਹੈ। ਸਾਲ 2023 ਵਿੱਚ ਇਸ ਵਿਵਾਦ ਨਾਲ ਜੁੜੀਆਂ ਝੜਪਾਂ ਕਾਰਨ ਹੋਟਲ ਵਿੱਚ ਭਾਰੀ ਹਿੰਸਾ ਹੋਈ ਸੀ, ਜਿਸਦੇ ਚਲਦਿਆਂ ਉਸਨੂੰ ਅਸਥਾਈ ਤੌਰ ‘ਤੇ ਬੰਦ ਕਰਨਾ ਪਿਆ ਸੀ।
ਇਸੇ ਸਾਲ ਮਈ ਵਿੱਚ, ਵਿਚੋਲਿਆਂ ਨੇ ਕਾਰੋਬਾਰੀ ਮੁਹੰਮਦ ਹੋਨਾਰਕਰ ਦੇ ਪੱਖ ਵਿੱਚ ਫੈਸਲਾ ਸੁਣਾਉਂਦੇ ਹੋਏ ਉਨ੍ਹਾਂ ਨੂੰ ਲਗਪਗ 1.34 ਬਿਲੀਅਨ ਡਾਲਰ ਦਾ ਹਰਜਾਨਾ ਦੇਣ ਦਾ ਆਦੇਸ਼ ਦਿੱਤਾ ਸੀ ਅਤੇ ਇਹ ਪਾਇਆ ਸੀ ਕਿ ਮਖੀਜਾਨੀ ਨੇ ਸਮਝੌਤਿਆਂ ਦੀ ਉਲੰਘਣਾ ਕਰਕੇ ਭਾਰੀ ਧੋਖਾਧੜੀ ਕੀਤੀ ਸੀ।
