ਵਾਸ਼ਿੰਗਟਨ। ਅਮਰੀਕਾ ’ਚ ਫਾਲ ਅਕੈਡਮਿਕ ਸੀਜ਼ਨ ਸ਼ੁਰੂ ਹੋਣ ਵਿੱਚ ਹੁਣ ਕੁਝ ਹੀ ਹਫ਼ਤੇ ਬਚੇ ਹਨ, ਅਜਿਹੇ ’ਚ ਭਾਰਤੀ ਵਿਦਿਆਰਥੀਆਂ ਸਮੇਤ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਲਈ ਸਮੇਂ ਸਿਰ ਸਟੂਡੈਂਟ-ਵੀਜ਼ਾ ਅਪਾਇੰਟਮੈਂਟ ਨਾ ਮਿਲਣਾ ਇੱਕ ਵੱਡੀ ਚਿੰਤਾ ਦਾ ਵਿਸ਼ਾ ਬਣ ਗਿਆ ਹੈ।ਇਸ ਮੁੱਦੇ ‘ਤੇ ਹੁਣ 30 ਅਮਰੀਕੀ ਸੀਨੇਟਰਾਂ ਨੇ ਵਿਦੇਸ਼ ਵਿਭਾਗ ‘ਤੇ ਦਬਾਅ ਬਣਾਉਂਦੇ ਹੋਏ F, M ਅਤੇ J ਵੀਜ਼ਾ ਦੀ ਪ੍ਰੋਸੈਸਿੰਗ ਵਿੱਚ ਹੋ ਰਹੀ ਦੇਰੀ ਦਾ ਸਪੱਸ਼ਟੀਕਰਨ ਮੰਗਿਆ ਹੈ। ਤੁਹਾਨੂੰ ਦੱਸ ਦਈਏ ਕਿ ਇਹ ਵੀਜ਼ਾ ਵਿਦਿਅਕ ਅਧਿਐਨ, ਵੋਕੇਸ਼ਨਲ ਕੋਰਸਾਂ ਅਤੇ ਐਕਸਚੇਂਜ ਪ੍ਰੋਗਰਾਮਾਂ ਲਈ ਦਿੱਤੇ ਜਾਂਦੇ ਹਨ।
ਵੀਜ਼ਾ ਅਪਾਇੰਟਮੈਂਟ ਦੀ ਕਮੀ ‘ਤੇ ਵਿਦੇਸ਼ ਮੰਤਰੀ ਨੂੰ ਸਵਾਲ
11 ਅਗਸਤ ਨੂੰ ਲਿਖੇ ਗਏ ਪੱਤਰ ਵਿੱਚ ਸੀਨੇਟਰ ਐਲੇਕਸ ਪਾਡਿਲਾ ਅਤੇ 29 ਹੋਰ ਸੀਨੇਟਰਾਂ ਨੇ ਅਮਰੀਕੀ ਵਿਦੇਸ਼ ਮੰਤਰੀ ਮਾਰਕੋ ਰੁਬੀਓ ਨੂੰ ਦੱਸਿਆ ਕਿ ਉਨ੍ਹਾਂ ਨੂੰ ਵਿਦਿਆਰਥੀਆਂ ਅਤੇ ਹੋਰ ਹਿੱਸੇਦਾਰਾਂ ਤੋਂ ਲਗਾਤਾਰ ਸ਼ਿਕਾਇਤਾਂ ਮਿਲ ਰਹੀਆਂ ਹਨ ਕਿ ਕਈ ਅਮਰੀਕੀ ਦੂਤਘਰਾਂ ਅਤੇ ਵਣਜ ਦੂਤਘਰਾਂ ’ਚ ਸਮੇਂ ਸਿਰ ਵੀਜ਼ਾ ਅਪਾਇੰਟਮੈਂਟ ਉਪਲਬਧ ਨਹੀਂ ਹਨ।
ਸੀਨੇਟਰਾਂ ਨੇ ਕਿਹਾ ਹੈ ਕਿ ਇਸ ਦੇਰੀ ਕਾਰਨ ਵਿਦਿਆਰਥੀ ਅਤੇ ਐਕਸਚੇਂਜ ਵਿਜ਼ਟਰ ਵਿਦਿਅਕ ਸਾਲ ਦੀ ਸ਼ੁਰੂਆਤ ਤੱਕ ਸਮੇਂ ਸਿਰ ਅਮਰੀਕਾ ਪਹੁੰਚਣ ਤੋਂ ਵਾਂਝੇ ਰਹਿ ਸਕਦੇ ਹਨ।
ਉਨ੍ਹਾਂ ਨੇ ਵਿਦੇਸ਼ ਵਿਭਾਗ ਤੋਂ ਇਹ ਸਪੱਸ਼ਟ ਕਰਨ ਲਈ ਕਿਹਾ ਹੈ ਕਿ ਇੰਟਰਵਿਊ ਲਈ ਅਪਾਇੰਟਮੈਂਟ ਕਿਵੇਂ ਅਲਾਟ ਕੀਤੇ ਜਾ ਰਹੇ ਹਨ, ਵਿਭਾਗ ਦੀਆਂ ਤਰਜੀਹਾਂ ਵਿੱਚ ਵਿਦਿਆਰਥੀ ਅਤੇ ਐਕਸਚੇਂਜ ਵੀਜ਼ਾ ਦਾ ਕੀ ਸਥਾਨ ਹੈ ਅਤੇ ਕੀ F, M ਅਤੇ J ਬਿਨੈਕਾਰਾਂ ਦੀ ਤਰਜੀਹ ਘਟਾ ਦਿੱਤੀ ਗਈ ਹੈ।
ਕੀ ਹਨ ਸੀਨੇਟਰਾਂ ਦੀਆਂ ਪ੍ਰਮੁੱਖ ਮੰਗਾਂ?
ਪੱਤਰ ’ਚ ਕਿਹਾ ਗਿਆ ਹੈ ਕਿ ਅਸੀਂ ਵਿਦੇਸ਼ ਵਿਭਾਗ ਨੂੰ ਅਪੀਲ ਕਰਦੇ ਹਾਂ ਕਿ ਜਾਂਚੇ-ਪਰਖੇ ਪਰਤ ਰਹੇ ਵਿਦਿਆਰਥੀ ਬਿਨੈਕਾਰਾਂ ਲਈ ਇੰਟਰਵਿਊ ’ਚ ਦਿੱਤੀ ਜਾਣ ਵਾਲੀ ਛੋਟ ਨੂੰ ਵਧਾਇਆ ਜਾਵੇ, ਸਮੇਂ ਸਿਰ ਵੀਜ਼ਾ ਦੀ ਜਾਂਚ ਅਤੇ ਪ੍ਰੋਸੈਸਿੰਗ ਲਈ ਲੋੜੀਂਦੇ ਕਰਮਚਾਰੀਆਂ ਦਾ ਪ੍ਰਬੰਧ ਯਕੀਨੀ ਬਣਾਇਆ ਜਾਵੇ ਅਤੇ ਵਧੇਰੇ ਪਾਰਦਰਸ਼ਤਾ ਨੂੰ ਉਤਸ਼ਾਹਤ ਕਰਨ ਲਈ ਹਿੱਸੇਦਾਰਾਂ ਨਾਲ ਸਾਰਥਕ ਰੂਪ ਵਿੱਚ ਗੱਲਬਾਤ ਕੀਤੀ ਜਾਵੇ।
ਇਸ ਪੱਤਰ ਵਿੱਚ ਕਰਮਚਾਰੀਆਂ ਦੀ ਗਿਣਤੀ, ਸਭ ਤੋਂ ਵੱਧ ਵਿਦਿਆਰਥੀ ਅਤੇ ਐਕਸਚੇਂਜ-ਵਿਜ਼ਟਰ ਵੀਜ਼ਾ ਪ੍ਰੋਸੈਸ ਕਰਨ ਵਾਲੇ ਪੰਜ ਪ੍ਰਮੁੱਖ ਕੇਂਦਰਾਂ ‘ਤੇ ਵੀਜ਼ਾ-ਪ੍ਰੋਸੈਸਿੰਗ ਦੇ औਸਤ ਸਮੇਂ, ਅਤੇ ਡੂੰਘਾਈ ਨਾਲ ਜਾਂਚ ਤੋਂ ਬਾਅਦ ਰੱਦ ਕੀਤੇ ਗਏ ਅਰਜ਼ੀਆਂ ਦੀ ਗਿਣਤੀ ਦਾ ਡੇਟਾ ਵੀ ਮੰਗਿਆ ਗਿਆ ਹੈ। ਦੇਰੀ ਕਾਰਨ ਭਾਰਤੀ ਵਿਦਿਆਰਥੀਆਂ ‘ਤੇ ਪਵੇਗਾ ਪ੍ਰਭਾਵ
ਸੀਨੇਟਰਾਂ ਦਾ ਇਹ ਦਖ਼ਲ ਅਜਿਹੇ ਸੰਵੇਦਨਸ਼ੀਲ ਸਮੇਂ ਵਿੱਚ ਆਇਆ ਹੈ ਜਦੋਂ ਕਈ ਭਾਰਤੀ ਵਿਦਿਆਰਥੀ ਫਾਲ 2026 ਇਨਟੇਕ ਲਈ ਅਮਰੀਕੀ ਯੂਨੀਵਰਸਿਟੀਆਂ ਵਿੱਚ ਜਾਣ ਦੀ ਤਿਆਰੀ ਕਰ ਰਹੇ ਹਨ।
ਹਾਲਾਂਕਿ, ਓਪਨ ਡੋਰਸ ਦਾ ਡਾਟਾ ਨਵੇਂ ਵਿਦਿਆਰਥੀਆਂ ਦੇ ਦਾਖ਼ਲੇ ਦਾ ਦੇਸ਼-ਵਾਰ ਵਿਸ਼ਲੇਸ਼ਣ ਨਹੀਂ ਦਿੰਦਾ ਹੈ ਪਰ ਅਮਰੀਕਾ ਜਾਣ ਵਾਲੇ ਵਿਦਿਆਰਥੀਆਂ ਵਿੱਚ ਇਤਿਹਾਸਕ ਰੂਪ ਵਿੱਚ ਭਾਰਤੀਆਂ ਦੀ ਗਿਣਤੀ ਕਾਫ਼ੀ ਵੱਡੀ ਰਹੀ ਹੈ।
ਅੰਕੜਿਆਂ ਮੁਤਾਬਕ, ਵਿਦਿਅਕ ਸਾਲ 2024-25 ਦੌਰਾਨ ਅਮਰੀਕਾ ਵਿੱਚ ਭਾਰਤ ਦੇ ਲਗਪਗ 3.6 ਲੱਖ ਵਿਦਿਆਰਥੀ ਪੜ੍ਹਾਈ ਕਰ ਰਹੇ ਸਨ।
ਇਮੀਗ੍ਰੇਸ਼ਨ ਵਕੀਲਾਂ ਦਾ ਕਹਿਣਾ ਹੈ ਕਿ ਕਰਮਚਾਰੀਆਂ ਦੀ ਭਾਰੀ ਕਮੀ ਅਤੇ ਸਖ਼ਤ ਇੰਟਰਵਿਊ ਪ੍ਰਕਿਰਿਆਵਾਂ ਕਾਰਨ ਵੀਜ਼ਾ ਮਿਲਣ ’ਚ ਬੇਮਿਸਾਲ ਦੇਰੀ ਹੋ ਰਹੀ ਹੈ, ਜਿਸ ਵਿੱਚ ਬਿਨੈਕਾਰਾਂ ਦੇ ਸੋਸ਼ਲ ਮੀਡੀਆ ਅਕਾਊਂਟਸ ਦੀ ਜਾਂਚ ਵੀ ਸ਼ਾਮਲ ਹੈ।
ਭਾਰਤੀ F-1 ਵੀਜ਼ਾ ਬਿਨੈਕਾਰਾਂ ਵਿਚਕਾਰ ਆਨਲਾਈਨ ਚਰਚਾਵਾਂ ਤੋਂ ਵੀ ਇਹ ਸਪੱਸ਼ਟ ਹੁੰਦਾ ਹੈ ਕਿ ਮੌਜੂਦਾ ਸਮੇਂ ਵਿੱਚ ਸਹੀ ਸਮੇਂ ‘ਤੇ ਅਪਾਇੰਟਮੈਂਟ ਪ੍ਰਾਪਤ ਕਰਨਾ ਵਿਦਿਆਰਥੀਆਂ ਲਈ ਇੱਕ ਵੱਡਾ ਸਿਰਦਰਦ ਬਣ ਗਿਆ ਹੈ।
