ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਭਾਰਤ ਦੀ ਰਣਨੀਤਕ ਖੁਦਮੁਖਤਿਆਰੀ ਅਤੇ ਸੁਤੰਤਰ ਵਿਦੇਸ਼ ਨੀਤੀ ਦਾ ਪੁਰਜ਼ੋਰ ਸਮਰਥਨ ਕੀਤਾ ਹੈ। ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਕਿਹਾ ਹੈ ਕਿ ਭਾਰਤ ਖ਼ਿਲਾਫ਼ ਪਾਬੰਦੀਆਂ ਦੀ ਕੋਈ ਵੀ ਧਮਕੀ ਤੁਰੰਤ ਪੁੱਠੀ ਸਾਬਤ ਹੋਵੇਗੀ। ਸਾਲਾਨਾ ‘ਸੇਂਟ ਪੀਟਰਸਬਰਗ ਇੰਟਰਨੈਸ਼ਨਲ ਇਕਨਾਮਿਕ ਫੋਰਮ’ (SPIEF) ਵਿੱਚ ਬੋਲਦਿਆਂ ਰੂਸੀ ਰਾਸ਼ਟਰਪਤੀ ਨੇ ਕਿਹਾ ਕਿ ਭਾਰਤ ਹਮੇਸ਼ਾ ਇੱਕ ਪ੍ਰਭੂਸੱਤਾ ਸੰਪੰਨ ਦੇਸ਼ ਵਜੋਂ ਕੰਮ ਕਰਦਾ ਹੈ ਅਤੇ ਪ੍ਰਧਾਨ ਮੰਤਰੀ ਮੋਦੀ ਦੀ ਅਗਵਾਈ ਵਿੱਚ ਪਾਬੰਦੀਆਂ ਦਾ ਕੋਈ ਵੀ ਸੰਭਾਵੀ ਖ਼ਤਰਾ ਤੁਰੰਤ ਬੂਮਰੈਂਗ ਸਾਬਤ ਹੋਵੇਗਾ।
ਉਨ੍ਹਾਂ ਕਿਹਾ, “ਅਸੀਂ ਲੰਮੇ ਸਮੇਂ ਤੋਂ ਪ੍ਰਧਾਨ ਮੰਤਰੀ ਮੋਦੀ ਨਾਲ ਨਜ਼ਦੀਕੀ ਗੱਲਬਾਤ ਕਰ ਰਹੇ ਹਾਂ। ਜਿੱਥੋਂ ਤੱਕ ਮੈਂ ਸਮਝਦਾ ਹਾਂ, ਸਾਰੀਆਂ ਪਾਬੰਦੀਆਂ ਨੂੰ ਖ਼ਤਮ ਕਰ ਦਿੱਤਾ ਗਿਆ ਹੈ ਅਤੇ ਅਮਰੀਕਾ ਤੇ ਭਾਰਤ ਵਿਚਾਲੇ ਸਬੰਧ ਸਫਲਤਾਪੂਰਵਕ ਅੱਗੇ ਵਧ ਰਹੇ ਹਨ।”
ਉਨ੍ਹਾਂ ਅੱਗੇ ਕਿਹਾ ਕਿ ਭਾਰਤ ਉਨ੍ਹਾਂ ਉਤਪਾਦਾਂ ਨੂੰ ਚੁਣਨ ਲਈ ਸੁਤੰਤਰ ਹੈ ਜਿਨ੍ਹਾਂ ਨੂੰ ਉਹ ਸਭ ਤੋਂ ਆਧੁਨਿਕ ਅਤੇ ਆਪਣੇ ਲਈ ਸਭ ਤੋਂ ਢੁਕਵਾਂ ਮੰਨਦਾ ਹੈ। ਭਾਰਤ ਹਮੇਸ਼ਾ ਆਪਣੇ ਰਾਸ਼ਟਰੀ ਹਿੱਤਾਂ ਦੇ ਮੁਤਾਬਕ ਹੀ ਫੈਸਲੇ ਲੈਂਦਾ ਹੈ।
ਸਿਆਸੀ ਮਾਹੌਲ ਤੋਂ ਪ੍ਰਭਾਵਿਤ ਨਹੀਂ ਹੋਣਗੇ ਭਾਰਤ-ਰੂਸ ਸਬੰਧ
ਰੂਸੀ ਰਾਸ਼ਟਰਪਤੀ ਨੇ ਸਾਫ਼ ਕੀਤਾ ਕਿ ਭਾਰਤ ਨਾਲ ਕ੍ਰੇਮਲਿਨ ਦਾ ਸਹਿਯੋਗ ਕਿਸੇ ਵੀ ਤਰ੍ਹਾਂ ਦੇ ਸਿਆਸੀ ਮਾਹੌਲ ਦੇ ਅਧੀਨ ਨਹੀਂ ਹੈ ਅਤੇ ਮਾਸਕੋ ਭਾਰਤ ਵਰਗੇ ਆਪਣੇ ਭਰੋਸੇਮੰਦ ਭਾਈਵਾਲਾਂ ਨੂੰ ਦਿੱਤੀਆਂ ਵਚਨਬੱਧਤਾਵਾਂ ‘ਤੇ ਹਮੇਸ਼ਾ ਕਾਇਮ ਰਹੇਗਾ।
ਉਨ੍ਹਾਂ ਕਿਹਾ, “ਭਾਰਤ ਨਾਲ ਸਾਡਾ ਸਹਿਯੋਗ, ਸਾਡੇ ਬਾਕੀ ਸਾਰੇ ਭਾਈਵਾਲਾਂ ਵਾਂਗ, ਸਿਆਸੀ ਉਤਾਰ-ਚੜ੍ਹਾਅ ਤੋਂ ਪ੍ਰਭਾਵਿਤ ਨਹੀਂ ਹੁੰਦਾ। ਕੋਈ ਸਾਨੂੰ ਇਹ ਨਿਰਦੇਸ਼ ਨਹੀਂ ਦੇ ਸਕਦਾ ਕਿ ਅਸੀਂ ਭਾਰਤ ਨੂੰ ਕੀ ਸਪਲਾਈ ਕਰੀਏ ਅਤੇ ਕੀ ਨਹੀਂ। ਕੋਈ ਵੀ ਸਾਨੂੰ ਨਿਰਦੇਸ਼ਤ ਨਹੀਂ ਕਰ ਸਕਦਾ ਅਤੇ ਕੋਈ ਅਜਿਹੀ ਕੋਸ਼ਿਸ਼ ਵੀ ਨਹੀਂ ਕਰੇਗਾ।”
ਗਲੋਬਲ ਅਰਥਵਿਵਸਥਾ ‘ਚ ਵੱਡੀ ਤਬਦੀਲੀ
ਪੁਤਿਨ ਨੇ ਗਲੋਬਲ ਅਰਥਵਿਵਸਥਾ ਦੇ ਬਦਲਦੇ ਸਮੀਕਰਨਾਂ ਦਾ ਜ਼ਿਕਰ ਕਰਦਿਆਂ ਕਿਹਾ, “ਆਰਥਿਕ ਆਕਾਰ ਦੇ ਮਾਮਲੇ ਵਿੱਚ ਬ੍ਰਿਕਸ (BRICS) ਨੇ ਜੀ-7 (G7) ਦੇਸ਼ਾਂ ਨੂੰ ਪਿੱਛੇ ਛੱਡ ਦਿੱਤਾ ਹੈ।” ਉਨ੍ਹਾਂ ਕਿਹਾ ਕਿ ਗਲੋਬਲ ਅਰਥਵਿਵਸਥਾ ਵਿੱਚ ਵਿਕਾਸਸ਼ੀਲ ਦੇਸ਼ ਲਗਾਤਾਰ ਮਹੱਤਵਪੂਰਨ ਭੂਮਿਕਾ ਨਿਭਾ ਰਹੇ ਹਨ, ਜਦੋਂ ਕਿ ਪੱਛਮੀ ਅਰਥਵਿਵਸਥਾਵਾਂ ਦੀ ਹਿੱਸੇਦਾਰੀ ਲਗਾਤਾਰ ਸੁੰਗੜ ਰਹੀ ਹੈ।
ਆਰਥਿਕ ਅੰਕੜੇ ਸਾਂਝੇ ਕਰਦਿਆਂ ਪੁਤਿਨ ਨੇ ਦੱਸਿਆ ਕਿ ਪਿਛਲੇ ਪੰਜ ਸਾਲਾਂ ਦੀ ਗਲੋਬਲ ਜੀਡੀਪੀ ਦੇ ਸਾਲਾਨਾ ਵਾਧੇ ਦਾ ਲਗਭਗ ਅੱਧਾ ਹਿੱਸਾ (49%) ਬ੍ਰਿਕਸ ਦੇਸ਼ਾਂ ਤੋਂ ਆਇਆ ਹੈ, ਜਦੋਂ ਕਿ ਜੀ-7 ਸਮੂਹ ਦਾ ਯੋਗਦਾਨ ਸਿਰਫ਼ 18% ਅਨੁਮਾਨਿਤ ਹੈ।
