ਅਮਰੀਕਾ ਨੇ ਹੋਰਮੁਜ਼ ਸਟ੍ਰੇਟ (Hormuz Strait) ਦੀ ਨਾਕਾਬੰਦੀ ਸ਼ੁਰੂ ਕਰ ਦਿੱਤੀ ਹੈ। ਇਸ ਦੇ ਨਾਲ ਹੀ ਸਾਰੀਆਂ ਈਰਾਨੀ ਬੰਦਰਗਾਹਾਂ ਅਤੇ ਹੋਰ ਤੱਟਵਰਤੀ ਇਲਾਕਿਆਂ ਤੋਂ ਆਉਣ ਵਾਲੇ ਈਰਾਨ ਦੇ ਸਾਰੇ ਜਹਾਜ਼ਾਂ ਨੂੰ ਰੋਕਣ ਦਾ ਕੰਮ ਕੀਤਾ ਜਾ ਰਿਹਾ ਹੈ। ਹਾਲਾਂਕਿ, ਈਰਾਨ ਨੇ ਇਸ ਨੂੰ ਗੈਰ-ਕਾਨੂੰਨੀ ਦੱਸਿਆ ਹੈ। ਨਾਕਾਬੰਦੀ ਦੀ ਕਾਰਵਾਈ ਨੂੰ ਲੈ ਕੇ US ਸੈਂਟਰਲ ਕਮਾਂਡ (CENTCOM) ਨੇ X ‘ਤੇ ਇਕ ਆਡੀਓ ਰਿਕਾਰਡਿੰਗ ਪੋਸਟ ਕੀਤੀ ਹੈ। CENTCOM ਦੇ ਆਡੀਓ ਵਿੱਚ ਕਿਹਾ ਗਿਆ ਹੈ, “ਨਾਕਾਬੰਦੀ ਤੋੜਨ ਦੀ ਕੋਸ਼ਿਸ਼ ਨਾ ਕਰੋ। ਈਰਾਨੀ ਬੰਦਰਗਾਹਾਂ ਤੋਂ ਆਉਣ-ਜਾਣ ਵਾਲੇ ਜਹਾਜ਼ਾਂ ‘ਤੇ ਰੋਕ ਲਗਾਉਣ ਅਤੇ ਉਨ੍ਹਾਂ ਨੂੰ ਜ਼ਬਤ ਕਰਨ ਦੀ ਕਾਰਵਾਈ ਕੀਤੀ ਜਾ ਰਹੀ ਹੈ।” ਇਸ ਦੌਰਾਨ ਜਹਾਜ਼ਾਂ ਨੂੰ ਵਾਪਸ ਮੁੜਨ ਅਤੇ ਨਾਕਾਬੰਦੀ ਦੀ ਪਾਲਣਾ ਕਰਨ ਦੀ ਗੱਲ ਵੀ ਕਹੀ ਜਾ ਰਹੀ ਹੈ। ਅਜਿਹਾ ਨਾ ਕਰਨ ‘ਤੇ ਬਲ ਪ੍ਰਯੋਗ (Force) ਕਰਨ ਦੀ ਚਿਤਾਵਨੀ ਦਿੱਤੀ ਜਾ ਰਹੀ ਹੈ।
ਨਾਕਾਬੰਦੀ ਲਈ USS ਅਬਰਾਹਮ ਲਿੰਕਨ ਜੰਗੀ ਜਹਾਜ਼ ਤਾਇਨਾਤ
ਉੱਥੇ ਹੀ, ਇੱਕ ਹੋਰ ਪੋਸਟ ਵਿੱਚ CENTCOM ਨੇ ਕਿਹਾ ਕਿ USS ਸਟ੍ਰਾਈਕ ਕੈਰੀਅਰ ਗਰੁੱਪ ਅਬਰਾਹਮ ਲਿੰਕਨ ਦੇ ਲਗਭਗ 5,000 ਮਲਾਹ ਅਤੇ ਮਰੀਨ ਜਹਾਜ਼ਾਂ ਨੂੰ ਰੋਕਣ ਲਈ ਮੁਹਿੰਮ ਚਲਾ ਰਹੇ ਹਨ। ਪੋਸਟ ਵਿੱਚ ਉਨ੍ਹਾਂ ਨੇ ਲਿਖਿਆ, “ਈਰਾਨੀ ਬੰਦਰਗਾਹਾਂ ਵਿੱਚ ਦਾਖਲ ਹੋਣ ਅਤੇ ਉੱਥੋਂ ਨਿਕਲਣ ਵਾਲੇ ਜਹਾਜ਼ਾਂ ਨੂੰ ਰੋਕਣ ਦਾ ਮਿਸ਼ਨ ਚਲਾਇਆ ਜਾ ਰਿਹਾ ਹੈ। USS ਅਬਰਾਹਮ ਲਿੰਕਨ (CVN 72) ਅਰਬ ਸਾਗਰ ਵਿੱਚ ਉਡਾਣ ਮੁਹਿੰਮ ਚਲਾ ਰਿਹਾ ਹੈ।”
