ਦੋ ਫ਼ਿਰਕਿਆਂ ’ਚ ਝੜਪਾਂ ਮਗਰੋਂ ਰੌਤਾਹਟ ਜ਼ਿਲ੍ਹੇ ’ਚ ਕਰਫਿਊ

ਪ੍ਰਸ਼ਾਸਨ ਨੇ ਦੱਖਣੀ ਨੇਪਾਲ ਦੇ ਮਧੇਸ਼ ਪ੍ਰਾਂਤ ਦੇ ਰੌਤਾਹਟ ਜ਼ਿਲ੍ਹੇ ਵਿੱਚ ਦੋ ਫ਼ਿਰਕਿਆਂ ’ਚ ਝੜਪ ਹੋਣ ਮਗਰੋਂ ਵਧੇ ਤਣਾਅ ਕਾਰਨ ਕਰਫਿਊ ਲਾ ਦਿੱਤਾ ਹੈ। ਇਹ ਝੜਪਾਂ ਵੀਰਵਾਰ ਸ਼ਾਮ ਸਮੇਂ ਹੋਏ ਹੋਈਆਂ, ਜਿਸ ਮਗਰੋਂ ਸ਼ੁੱਕਰਵਾਰ ਤੇ ਸ਼ਨਿਚਰਵਾਰ ਸਵੇਰ ਤੱਕ ਦੋਵਾਂ ਧਿਰਾਂ ’ਚ ਤਣਾਅ ਕਾਫ਼ੀ ਵਧ ਗਿਆ, ਜਿਸ ਦੌਰਾਨ ਘੱਟੋ-ਘੱਟ ਅੱਠ ਜਣੇ ਜ਼ਖਮੀ ਹੋ ਗਏ। ਮੁੱਖ ਜ਼ਿਲ੍ਹਾ ਅਧਿਕਾਰੀ ਦਿਨੇਸ਼ ਸਾਗਰ ਭੂਸਲ ਮੁਤਾਬਕ ਰੌਤਾਹਟ ਜ਼ਿਲ੍ਹਾ ਸੁਰੱਖਿਆ ਕਮੇਟੀ ਵੱਲੋਂ ਲਏ ਫ਼ੈਸਲੇ ਮੁਤਾਬਕ ਜ਼ਿਲ੍ਹਾ ਹੈੱਡਕੁਆਰਟਰ ਗੌੜ ਅਤੇ ਹੋਰ ਹਿੱਸਿਆਂ ਵਿੱਚ ਸ਼ਨਿਚਰਵਾਰ ਬਾਅਦ ਦੁਪਹਿਰ 1 ਵਜੇ ਤੋਂ ਅਗਲੇ ਹੁਕਮਾਂ ਤੱਕ ਕਰਫਿਊ ਲਾ ਦਿੱਤਾ ਗਿਆ ਹੈ। ਸਥਾਨਕ ਪ੍ਰਸ਼ਾਸਨ ਐਕਟ ਦੀ ਧਾਰਾ 6 (ਏ) ਤਹਿਤ ਜ਼ਿਲ੍ਹਾ ਪ੍ਰਸ਼ਾਸਨ ਨੇ ਕਰਫਿਊ ਵਾਲੇ ਇਲਾਕੇ ਵਿੱਚ ਲੋਕਾਂ ਦੀ ਆਵਾਜਾਈ, ਇਕੱਤਰਤਾ, ਰੈਲੀਆਂ ਤੇ ਮੁਜ਼ਾਹਰੇ ਕਰਨ ’ਤੇ ਰੋਕ ਲਾ ਦਿੱਤੀ ਹੈ। ਦੋ ਧੜਿਆਂ ਵਿੱਚ ਝੜਪਾਂ ਦੀ ਸ਼ੁਰੂਆਤ ਵੀਰਵਾਰ ਨੂੰ ਗੌੜ ਮਿਉਂਸਿਪਲ ਖੇਤਰ ਦੇ ਸਪਗੜ੍ਹਾ ਇਲਾਕੇ ਵਿੱਚ ਉਸ ਸਮੇਂ ਹੋਈ ਜਦੋਂ ਇੱਕ ਫ਼ਿਰਕੇ ਦੇ ਲੋਕਾਂ ਨੇ ਮਸਜਿਦ ਸਾਹਮਣਿਓਂ ਲੰਘਦੀ ਬਰਾਤ ਨੂੰ ਸੰਗੀਤ ਵਜਾਉਣ ਤੋਂ ਰੋਕਿਆ, ਜਿਸ ਮਗਰੋਂ ਦੋਵਾਂ ਧੜਿਆਂ ਵਿੱਚ ਹਿੰਸਕ ਝੜਪਾਂ ਹੋਈਆਂ। ਇਸ ਘਟਨਾ ਵਿੱਚ ਦੋ ਪੁਲੀਸ ਮੁਲਾਜ਼ਮਾਂ ਸਮੇਤ ਘੱਟੋ-ਘੱਟ ਅੱਠ ਜਣੇ ਜ਼ਖ਼ਮੀ ਹੋ ਗਏ। ਪ੍ਰਸ਼ਾਸਨ ਵੱਲੋਂ ਇਲਾਕੇ ’ਚ ਝੜਪ ਰੋਕਣ ਲਈ ਸੈਂਕੜੇ ਦੰਗਾ ਰੋਕੂ ਪੁਲੀਸ ਮੁਲਾਜ਼ਮ ਤਾਇਨਾਤ ਕਰ ਦਿੱਤੇ ਗਏ ਸਨ।