ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਅਤੇ ਇਜ਼ਰਾਈਲੀ ਪੀਐਮ ਬੈਂਜਾਮਿਨ ਨੇਤਨਯਾਹੂ ਵਿਚਾਲੇ ਸਭ ਕੁਝ ਠੀਕ ਨਹੀਂ ਚੱਲ ਰਿਹਾ ਹੈ। ਮੀਡੀਆ ਆਊਟਲੈੱਟ ‘ਐਕਸੀਓਸ’ (Axios) ਦੀ ਇੱਕ ਰਿਪੋਰਟ ਦੇ ਅਨੁਸਾਰ, ਰਾਸ਼ਟਰਪਤੀ ਟਰੰਪ ਨੇ ਲੇਬਨਾਨ ਵਿੱਚ ਇਜ਼ਰਾਈਲ ਦੀ ਵਧਦੀ ਫ਼ੌਜੀ ਕਾਰਵਾਈ ਨੂੰ ਲੈ ਕੇ ਪ੍ਰਧਾਨ ਮੰਤਰੀ ਨੇਤਨਯਾਹੂ ਨੂੰ ਫ਼ੋਨ ‘ਤੇ ਜੰਮ ਕੇ ਝਾੜ ਪਾਈ ਹੈ। ਦਰਅਸਲ, ਈਰਾਨ ਨਾਲ ਚੱਲ ਰਹੀ ਸ਼ਾਂਤੀ ਵਾਰਤਾ ਵਿੱਚ ਰੁਕਾਵਟ ਆਉਣ ਤੋਂ ਬਾਅਦ ਅਮਰੀਕੀ ਰਾਸ਼ਟਰਪਤੀ ਟਰੰਪ ਲੇਬਨਾਨ ਅਤੇ ਇਜ਼ਰਾਈਲ ਵਿਚਾਲੇ ਜੰਗਬੰਦੀ ਦੀ ਵਿਚੋਲਗੀ ਕਰ ਰਹੇ ਹਨ। ਲੇਬਨਾਨ ਵਿੱਚ ਹਮਲੇ ਰੋਕਣ ਲਈ ਟਰੰਪ ਨੇ ਨੇਤਨਯਾਹੂ ਨੂੰ ਫ਼ੋਨ ਕੀਤਾ ਸੀ।
ਮੀਡੀਆ ਆਊਟਲੈੱਟ ‘ਐਕਸੀਓਸ’ ਨੇ ਇੱਕ ਅਮਰੀਕੀ ਅਧਿਕਾਰੀ ਦੇ ਹਵਾਲੇ ਨਾਲ ਦੱਸਿਆ ਕਿ ਨੇਤਨਯਾਹੂ ਨਾਲ ਫ਼ੋਨ ਕਾਲ ਦੌਰਾਨ ਟਰੰਪ ਨੇ ਕਿਹਾ, “ਤੂੰ ਬਿਲਕੁਲ ਪਾਗਲ ਹੈਂ। ਜੇ ਮੈਂ ਨਾ ਹੁੰਦਾ, ਤਾਂ ਤੂੰ ਹੁਣ ਤੱਕ ਜੇਲ੍ਹ ਵਿੱਚ ਹੁੰਦਾ। ਮੈਂ ਤੇਰੀ ਜਾਨ ਬਚਾ ਰਿਹਾ ਹਾਂ। ਹੁਣ ਹਰ ਕੋਈ ਤੈਨੂੰ ਨਫ਼ਰਤ ਕਰਦਾ ਹੈ। ਤੇਰੀ ਵਜ੍ਹਾ ਕਰਕੇ ਹਰ ਕੋਈ ਇਜ਼ਰਾਈਲ ਨੂੰ ਵੀ ਨਫ਼ਰਤ ਕਰਦਾ ਹੈ।”
ਟਰੰਪ ਨੇ ਨੇਤਨਯਾਹੂ ਅਤੇ ਹਿਜ਼ਬੁੱਲਾ ਨਾਲ ਕੀਤੀ ਸੀ ਗੱਲਬਾਤ
ਜ਼ਿਕਰਯੋਗ ਹੈ ਕਿ ਇਸ ਤੋਂ ਠੀਕ ਪਹਿਲਾਂ ਅਮਰੀਕੀ ਰਾਸ਼ਟਰਪਤੀ ਟਰੰਪ ਨੇ ਇਜ਼ਰਾਈਲ ਅਤੇ ਲੇਬਨਾਨ ਵਿਚਾਲੇ ਜੰਗਬੰਦੀ ਦੀ ਗੱਲ ਕਹੀ ਸੀ। ਟਰੰਪ ਨੇ ‘ਟਰੂਥ ਸੋਸ਼ਲ’ ‘ਤੇ ਲਿਖਿਆ ਸੀ, “ਮੇਰੀ ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨਾਲ ਬਹੁਤ ਹੀ ਸਾਰਥਕ ਗੱਲਬਾਤ ਹੋਈ, ਅਤੇ ਬੈਰੂਤ ਵਿੱਚ ਕੋਈ ਵੀ ਸੈਨਿਕ ਨਹੀਂ ਭੇਜਿਆ ਜਾਵੇਗਾ, ਜੋ ਫ਼ੌਜੀ ਰਸਤੇ ਵਿੱਚ ਸਨ, ਉਨ੍ਹਾਂ ਨੂੰ ਵੀ ਵਾਪਸ ਬੁਲਾ ਲਿਆ ਗਿਆ ਹੈ।
ਇਸੇ ਤਰ੍ਹਾਂ, ਉੱਚ-ਪੱਧਰੀ ਨੁਮਾਇੰਦਿਆਂ ਰਾਹੀਂ, ਮੇਰੀ ਹਿਜ਼ਬੁੱਲਾ ਨਾਲ ਵੀ ਬਹੁਤ ਚੰਗੀ ਗੱਲਬਾਤ ਹੋਈ ਅਤੇ ਉਹ ਇਸ ਗੱਲ ‘ਤੇ ਸਹਿਮਤ ਹੋਏ ਹਨ ਕਿ ਗੋਲੀਬਾਰੀ ਪੂਰੀ ਤਰ੍ਹਾਂ ਬੰਦ ਕਰ ਦਿੱਤੀ ਜਾਵੇਗੀ। ਯਾਨੀ ਇਜ਼ਰਾਈਲ ਉਨ੍ਹਾਂ ‘ਤੇ ਹਮਲਾ ਨਹੀਂ ਕਰੇਗਾ, ਅਤੇ ਉਹ ਇਜ਼ਰਾਈਲ ‘ਤੇ ਹਮਲਾ ਨਹੀਂ ਕਰਨਗੇ।”
