ਬ੍ਰਿਟੇਨ ‘ਚ ਭਾਰਤੀ ਸਿਹਤ ਕਾਮੇ ਦੀ ਵੱਡੀ ਜਿੱਤ: ਕੰਮ ਨਾ ਦੇਣ ‘ਤੇ ਸਪਾਂਸਰ ਕੰਪਨੀ ਨੂੰ 28 ਹਜ਼ਾਰ ਪਾਊਂਡ ਜੁਰਮਾਨਾ

 ਬ੍ਰਿਟੇਨ ਵਿਚ ਕਾਨੂੰਨੀ ਤਰੀਕੇ ਨਾਲ ਕੰਮ ਕਰਨ ਲਈ ਆਏ ਭਾਰਤੀ ਸਿਹਤ ਅਤੇ ਦੇਖ-ਭਾਲ ਮੁਲਾਜ਼ਮ ਨੂੰ ਉਸ ਦੀ ਸਪਾਂਸਰ ਕੰਪਨੀ ਵੱਲੋਂ ਕੰਮ ਨਾ ਦਿੱਤੇ ਜਾਣ ’ਤੇ ਬ੍ਰਿਟਿਸ਼ ਜੱਜ ਨੇ ਵੱਡਾ ਹਰਜਾਨਾ ਤੇ ਛੁੱਟੀ ਦੇ ਭੁਗਤਾਨ ਦੀ ਰਕਮ ਦੇਣ ਦਾ ਫ਼ੈਸਲਾ ਸੁਣਾਇਆ ਹੈ। ਇਸ ਵਿਚ 28,000 ਪੌਂਡ ਤੋਂ ਵੱਧ ਦੀ ਅਦਾ ਕਰਨ ਯੋਗ ਉਸ ਦੀ ਉਜਰਤ ਸ਼ਾਮਲ ਹੈ। ਅਦਾਲਤ ਦਾ ਕਹਿਣਾ ਹੈ ਕਿ ਉਹ ਨਿਪੁੰਨ ਸਿਹਤ ਕਾਮੇ ਦੇ ਤੌਰ ’ਤੇ ਇੱਥੇ ਆਇਆ ਸੀ ਪਰ ਉਸ ਦੀ ਸਪਾਂਸਰ ਕੰਪਨੀ ਨੇ ਉਸ ਨੂੰ ਪਹਿਲਾਂ ਤੋਂ ਤੈਅ ਕੀਤਾ ਰੋਜ਼ਗਾਰ ਨਹੀਂ ਮੁਹੱਈਆ ਕਰਵਾਇਆ। 33 ਸਾਲਾ ਸ਼ਾਬਿਨ ਸ਼ਾਜੀ ਸਿਹਤ ਅਤੇ ਦੇਖ-ਭਾਲ ਮੁਲਾਜ਼ਮ ਵੀਜ਼ਾ ’ਤੇ ਬ੍ਰਿਟੇਨ ਵਿਚ ਆਏ ਸਨ ਤੇ ਸਿਹਤ ਖੇਤਰ ਵਿਚ ਨੌਕਰੀ ਲਈ ਸਵਾਨ ਕੇਅਰ ਸਾਲਿਊਸ਼ਨਜ਼ ਲਿਮਟਿਡ ਤੋਂ ਜ਼ਰੂਰੀ ਸਪਾਂਸਰ ਪ੍ਰਮਾਣ ਪੱਤਰ ਪ੍ਰਾਪਤ ਕੀਤਾ ਸੀ। ਉਨ੍ਹਾਂ ਨੇ ਹਾਲ ਹੀ ਵਿਚ ਬਰਮਿੰਘਮ ਵਿਚ ਇਕ ਜੱਜ ਨੂੰ ਦੱਸਿਆ ਕਿ ਸਪਾਂਸਰ ਨੇ ਕਦੇ ਵੀ ਮੈਨੂੰ ਕੰਮ ਨਹੀਂ ਦਿੱਤਾ ਜਾਂ ਕੰਮ ਕਰਵਾ ਕੇ ਭੁਗਤਾਨ ਨਹੀਂ ਕੀਤਾ। ਰੋਜ਼ਗਾਰ ਅਦਾਲਤ ਦੇ ਜੱਜ ਐਡਮੰਡਸ ਨੇ ਸਿੱਟਾ ਕੱਢਿਆ ਕਿ ਦਾਅਵੇਦਾਰ (ਸ਼ਾਜੀ) 15 ਅਪ੍ਰੈਲ, 2023 ਤੋਂ 21 ਅਪ੍ਰੈਲ, 2024 ਤੱਕ ਰੋਜ਼ਗਾਰ ’ਤੇ ਲੱਗਾ ਸੀ। ਇਹ 40 ਘੰਟੇ ਦੇ ਕਾਰਜ ਹਫ਼ਤੇ ਦੇ ਅਧਾਰ ’ਤੇ 22,880 ਪੌਂਡ ਸਾਲਾਨਾ ਦੀ ਕੁੱਲ ਮਜ਼ਦੂਰੀ ‘ਤੇ ਅਧਾਰਤ ਸੀ। ਪਿਛਲੇ ਮਹੀਨੇ ਦੀ ਸੁਣਵਾਈ ਵਿਚ ਕੰਪਨੀ ਨੂੰ ਤਨਖ਼ਾਹ ਤੋਂ ਸੱਖਣੀ ਮਜ਼ਦੂਰੀ, ਛੁੱਟੀ ਦੇ ਭੁਗਤਾਨ ਅਤੇ ਇਲਾਜ ਦੀ ਲਾਗਤ ਦੇ ਨਾਲ-ਨਾਲ ਕਾਨੂੰਨੀ ਕਾਰਵਾਈ ਦੇ ਖ਼ਰਚੇ ਕਵਰ ਕਰਨ ਦਾ ਹੁਕਮ ਵੀ ਦਿੱਤਾ ਗਿਆ। ਸਪਾਂਸਰ ਨੇ ਜੱਜ ਨੂੰ ਜਾਣੂ ਕਰਵਾਇਆ ਕਿ ਸ਼ਾਜੀ ਦੀ ਨੌਕਰੀ ਸ਼ੁਰੂ ਨਹੀਂ ਹੋਈ ਕਿਉਂਕਿ ਰਸਮੀ ਕਾਰਵਾਈ ਅਧੂਰੀ ਸਨ। ਸ਼ਾਜੀ, ਜੋ ਕੇਰਲਮ ਤੋਂ ਵੈਸਟ ਮਿਡਲੈਂਡਸ ਦੇ ਸਟੈਫੋਰਡ ਵਿਚ ਆਏ ਸਨ, ਵੀਜ਼ਾ ਰੋਕਾਂ ਕਾਰਨ ਬ੍ਰਿਟੇਨ ਵਿਚ ਹੋਰ ਰੋਜ਼ਗਾਰ ਦੀ ਭਾਲ ਨਹੀਂ ਕਰ ਸਕੇ। ਉਨ੍ਹਾਂ ਨੇ ਆਖ਼ਰਕਾਰ ਬਦਲਵਾਂ ਕੁਲਵਕਤੀ ਰੋਜ਼ਗਾਰ ਪ੍ਰਾਪਤ ਕਰ ਲਿਆ ਪਰ ਉਸ ਸਮੇਂ ਤੱਕ ਉਨ੍ਹਾਂ ਨੂੰ ਕਾਫ਼ੀ ਵਿੱਤੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ।