ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਇਸ ਮਹੀਨੇ ਹੋਣ ਵਾਲੇ ਦੌਰੇ ਤੋਂ ਪਹਿਲਾਂ ਭਾਰਤ ਤੇ ਇਜ਼ਰਾਈਲ ਨੇ ਰੱਖਿਆ ਸਬੰਧਾਂ ਦੀ ਮਜ਼ਬੂਤੀ ਲਈ ਸਹਿਮਤੀ ਪੱਤਰਾਂ (ਐੱਮ ਓ ਯੂ) ’ਤੇ ਦਸਤਖ਼ਤ ਕੀਤੇ ਹਨ।
ਇਜ਼ਰਾਈਲ ਦੇ ਰੱਖਿਆ ਮੰਤਰਾਲੇ ਨੇ ਭਾਰਤ ਅਤੇ ਇਜ਼ਰਾਈਲ ਦੇ ਮੁੱਖ ਰੱਖਿਆ ਉਦਯੋਗਾਂ ਦਰਮਿਆਨ ਮੀਟਿੰਗਾਂ ਕੀਤੀਆਂ ਅਤੇ ਸਹਿਮਤੀ ਪੱਤਰਾਂ ’ਤੇ ਸਹੀ ਪਾਈ। ਇਜ਼ਰਾਈਲ ਦੇ ਰੱਖਿਆ ਮੰਤਰਾਲੇ ਨੇ ਬਿਆਨ ਵਿੱਚ ਕਿਹਾ ਕਿ ਐੱਸ ਆਈ ਬੀ ਏ ਟੀ (ਇੰਟਰਨੈਸ਼ਨਲ ਡਿਫੈਂਸ ਕੋਅਪਰੇਸ਼ਨ ਡਾਇਰੈਕਟੋਰੇਟ) ਨੇ ਸੁਸਾਇਟੀ ਆਫ ਇੰਡੀਅਨ ਡਿਫੈਂਸ ਮੈਨੂਫੈਕਚਰਰਜ਼ (ਐੱਸ ਆਈ ਡੀ ਐੱਮ) ਅਤੇ ਭਾਰਤ ਦੇ ਰੱਖਿਆ ਮੰਤਰਾਲੇ ਦੇ ਸਹਿਯੋਗ ਨਾਲ ਇਸ ਹਫ਼ਤੇ ਮੋਹਰੀ ਭਾਰਤੀ ਇਜ਼ਰਾਇਲੀ ਰੱਖਿਆ ਕੰਪਨੀਆਂ ਦਰਮਿਆਨ ਗੋਸ਼ਟੀ ਅਤੇ ਬੀ 2 ਬੀ (ਬਿਜ਼ਨੈੱਸ ਟੂ ਬਿਜ਼ਨੈੱਸ) ਮੀਟਿੰਗਾਂ ਕੀਤੀਆਂ। ਬਿਆਨ ਮੁਤਾਬਕ, ‘‘ਗੋਸ਼ਟੀ ਦੀ ਪ੍ਰਧਾਨਗੀ ਐੱਸ ਆਈ ਬੀ ਏ ਟੀ ਦੇ ਨਿਰਦੇਸ਼ਕ ਬ੍ਰਿਗੇਡੀਅਰ ਜਨਰਲ (ਸੇਵਾਮੁਕਤ) ਯਾਇਰ ਕੁਲਾਸ ਨੇ ਕੀਤੀ। ਇਸ ਵਿੱਚ 30 ਭਾਰਤੀ ਅਤੇ 26 ਇਜ਼ਰਾਇਲੀ ਰੱਖਿਆ ਕੰਪਨੀਆਂ ਦੇ ਨੁਮਾਇੰਦਿਆਂ ਨੇ ਹਿੱਸਾ ਲਿਆ।’’ ਭਾਰਤੀ ਵਫ਼ਦ ਦੀ ਅਗਵਾਈ ਐੱਸ ਆਈ ਡੀ ਐੱਮ ਦੇ ਜਨਰਲ ਡਾਇਰੈਕਟਰ ਰਮੇਸ਼ ਕੇ ਨੇ ਕੀਤੀ ਅਤੇ ਇਸ ਵਿੱਚ ਇਜ਼ਰਾਈਲ ’ਚ ਭਾਰਤ ਦੇ ਰਾਜਦੂਤ ਜੇ ਪੀ ਸਿੰਘ ਅਤੇ ਇਜ਼ਰਾਈਲ ਵਿੱਚ ਭਾਰਤ ਦੇ ਰੱਖਿਆ ਨੁਮਾਇੰਦੇ ਗਰੁੱਪ ਕੈਪਟਨ ਵਿਜੈ ਪਾਟਿਲ ਸ਼ਾਮਲ ਸਨ। ਪ੍ਰਧਾਨ ਮੰਤਰੀ ਮੋਦੀ 25 ਫਰਵਰੀ ਨੂੰ ਦੋ ਰੋਜ਼ਾ ਦੌਰੇ ’ਤੇ ਇਜ਼ਰਾਈਲ ਪਹੁੰਚਣਗੇ। ਸੰਭਾਵਨਾ ਹੈ ਕਿ ਉਹ ਆਪਣੀਆਂ ਮੀਟਿੰਗਾਂ ਦੌਰਾਨ ਦੁਵੱਲੇ ਅਤੇ ਖੇਤਰੀ ਹਿੱਤ ਦੇ ਸਾਰੇ ਮੁੱਦਿਆਂ ’ਤੇ ਚਰਚਾ ਕਰਨਗੇ।
