ਰਿਆਦ – ਯਮਨ ਸੰਘਰਸ਼ ਸੋਮਵਾਰ ਨੂੰ ਇੱਕ ਵਾਰ ਫਿਰ ਭਿਆਨਕ ਮੋੜ ‘ਤੇ ਪਹੁੰਚ ਗਿਆ। ਈਰਾਨ ਸਮਰਥਿਤ ਹੂਤੀ ਬਾਗੀਆਂ ਨੇ ਸਾਊਦੀ ਅਰਬ ਦੇ ਕਈ ਸ਼ਹਿਰਾਂ ਨੂੰ ਨਿਸ਼ਾਨਾ ਬਣਾਉਂਦੇ ਹੋਏ ਲਗਾਤਾਰ ਬੈਲਿਸਟਿਕ ਮਿਜ਼ਾਈਲਾਂ ਅਤੇ ਡਰੋਨ ਦਾਗੇ। ਇਸ ਹਮਲੇ ਵਿੱਚ 13 ਲੋਕ ਜ਼ਖ਼ਮੀ ਹੋ ਗਏ ਅਤੇ ਘੱਟੋ-ਘੱਟ ਸੱਤ ਰਿਹਾਇਸ਼ੀ ਮਕਾਨਾਂ ਨੂੰ ਭਾਰੀ ਨੁਕਸਾਨ ਪਹੁੰਚਿਆ ਹੈ।
ਸਾਊਦੀ ਫੌਜੀ ਬੁਲਾਰੇ ਨੇ ਕੀਤੀ ਪੁਸ਼ਟੀ
ਸਾਊਦੀ ਅਗਵਾਈ ਵਾਲੇ ਫੌਜੀ ਗਠਜੋੜ ਦੇ ਬੁਲਾਰੇ ਮੇਜਰ ਜਨਰਲ ਤੁਰਕੀ ਅਲ-ਮਲਿਕੀ ਨੇ ਘਟਨਾ ਦੀ ਪੁਸ਼ਟੀ ਕਰਦਿਆਂ ਦੱਸਿਆ ਕਿ ਹੂਤੀ ਬਲਾਂ ਨੇ ਖਮੀਸ ਮੁਸ਼ੈਤ, ਅਭਾ ਅਤੇ ਤਾਇਫ਼ ਵਰਗੇ ਪ੍ਰਮੁੱਖ ਸ਼ਹਿਰਾਂ ਨੂੰ ਨਿਸ਼ਾਨਾ ਬਣਾਇਆ। ਖਮੀਸ ਮੁਸ਼ੈਤ ਸਥਿਤ ਇੱਕ ਫੌਜੀ ਹਵਾਈ ਅੱਡੇ ‘ਤੇ ਦਰਜਨਾਂ ਮਿਜ਼ਾਈਲਾਂ ਅਤੇ ਡਰੋਨ ਦਾਗੇ ਗਏ। ਇਨ੍ਹਾਂ ਦਾ ਮੁੱਖ ਨਿਸ਼ਾਨਾ ਜਹਾਜ਼ਾਂ ਦੇ ਹੈਂਗਰ, ਰਡਾਰ ਸਿਸਟਮ, ਰਨਵੇ ਅਤੇ ਗੋਲਾ-ਬਾਰੂਦ ਦੇ ਡਿਪੋ ਸਨ। ਹਮਲੇ ਤੋਂ ਤੁਰੰਤ ਬਾਅਦ ਸਾਊਦੀ ਅਧਿਕਾਰੀਆਂ ਨੇ ਦੱਖਣੀ ਖੇਤਰਾਂ ਵਿੱਚ ਐਮਰਜੈਂਸੀ ਅਲਰਟ ਜਾਰੀ ਕਰ ਦਿੱਤਾ।
ਜਵਾਬੀ ਕਾਰਵਾਈ ਵਿੱਚ ਹੂਤੀ ਟਿਕਾਣਿਆਂ ‘ਤੇ ਹਮਲੇ
ਜਵਾਬੀ ਕਾਰਵਾਈ ਵਜੋਂ ਸਾਊਦੀ ਅਤੇ ਯਮਨੀ ਹਵਾਈ ਫੌਜ ਨੇ ਵੀ ਹੂਤੀਆਂ ਦੇ ਟਿਕਾਣਿਆਂ ‘ਤੇ ਹਵਾਈ ਹਮਲੇ ਤੇਜ਼ ਕਰ ਦਿੱਤੇ ਹਨ। ਲਾਲ ਸਾਗਰ ਦੇ ਕੰਢੇ ਸਥਿਤ ਮੋਖਾ ਬੰਦਰਗਾਹ ਦੇ ਆਸ-ਪਾਸ ਦੇ ਇਲਾਕਿਆਂ ਵਿੱਚ ਭਾਰੀ ਬੰਬਾਰੀ ਕੀਤੀ ਗਈ ਹੈ। ਦੂਜੇ ਪਾਸੇ, ਹੂਤੀ ਬਾਗੀ ਯਮਨ ਦੇ ਪੱਛਮੀ ਤੱਟ ਅਤੇ ਲਾਲ ਸਾਗਰ ਦੇ ਮੁਹਾਣੇ ‘ਤੇ ਸਥਿਤ ਪੇਰੀਮ ਟਾਪੂ ‘ਤੇ ਕਬਜ਼ਾ ਕਰਕੇ ਆਪਣੀ ਸਥਿਤੀ ਮਜ਼ਬੂਤ ਕਰ ਰਹੇ ਹਨ।
