ਯੂਕਰੇਨੀ ਡਰੋਨਾਂ ਨੇ ਅੱਜ ਰੂਸ ਦੇ ਅੰਦਰੂਨੀ ਹਿੱਸੇ ਵਿੱਚ ਉਦਯੋਗਿਕ ਇਕਾਈ ਨੂੰ ਨਿਸ਼ਾਨਾ ਬਣਾਇਆ। ਰੂਸੀ ਨਿਊਜ਼ ਚੈਨਲ ਅਨੁਸਾਰ ਇਹ ਨਿਸ਼ਾਨਾ ਮਹੱਤਵਪੂਰਨ ਸਰਕਾਰੀ ਮਿਜ਼ਾਈਲ ਫੈਕਟਰੀ ਸੀ। ਹਮਲਾ ਰੂਸ ਦੇ ਉਦਮੁਰਤ ਗਣਰਾਜ ਵਿੱਚ ਹੋਇਆ। ਸਥਾਨਕ ਸਿਹਤ ਮੰਤਰੀ ਸਰਗੇਈ ਬੇਗਿਨ ਅਨੁਸਾਰ, ਇਸ ਹਮਲੇ ਵਿੱਚ 11 ਵਿਅਕਤੀ ਜ਼ਖਮੀ ਹੋਏ ਹਨ, ਜਿਨ੍ਹਾਂ ਵਿੱਚੋਂ ਤਿੰਨ ਨੂੰ ਹਸਪਤਾਲ ’ਚ ਦਾਖ਼ਲ ਕਰਵਾਇਆ ਗਿਆ ਹੈ। ਖੇਤਰੀ ਮੁਖੀ ਐਲੇਗਜ਼ੈਂਦਰ ਬ੍ਰੇਚਾਲੋਵ ਨੇ ਟੈਲੀਗ੍ਰਾਮ ’ਤੇ ਦੱਸਿਆ ਕਿ ਯੂਕਰੇਨ ਵੱਲੋਂ ਲਾਂਚ ਕੀਤੇ ਡਰੋਨਾਂ ਨੇ ਗਣਰਾਜ ਦੀ ਇਕਾਈ ’ਤੇ ਹਮਲਾ ਕੀਤਾ ਹੈ। ਹਮਲੇ ਕਾਰਨ ਕਾਫੀ ਨੁਕਸਾਨ ਹੋਇਆ ਹੈ ਅਤੇ ਕਈ ਜਣਿਆਂ ਦੇ ਸੱਟਾਂ ਲੱਗੀਆਂ ਹਨ ਪਰ ਉਨ੍ਹਾਂ ਨੇ ਇਕਾਈ ਦਾ ਨਾਮ ਜਾਂ ਹੋਰ ਵੇਰਵੇ ਸਾਂਝੇ ਨਹੀਂ ਕੀਤੇ। ਗੈ਼ਰ-ਸਰਕਾਰੀ ਰੂਸੀ ਟੈਲੀਗ੍ਰਾਮ ਚੈਨਲ ‘ਐਸਤਰਾ’ ਨੇ ਦਾਅਵਾ ਕੀਤਾ ਹੈ ਕਿ ਯੂਕਰੇਨੀ ਡਰੋਨਾਂ ਨੇ ਵੋਤਕਿਨਸਕ ਮਸ਼ੀਨ ਬਿਲਡਿੰਗ ਪਲਾਂਟ ’ਤੇ ਹਮਲਾ ਕੀਤਾ ਹੈ, ਜੋ ਇੱਕ ਪ੍ਰਮੁੱਖ ਸਰਕਾਰੀ ਰੱਖਿਆ ਉੱਦਮ ਹੈ। ਇਹ ਦਾਅਵਾ ਸਥਾਨਕ ਲੋਕਾਂ ਵੱਲੋਂ ਬਣਾਈਆਂ ਗਈਆਂ ਵੀਡੀਓਜ਼ ਦੇ ਵਿਸ਼ਲੇਸ਼ਣ ’ਤੇ ਆਧਾਰਤ ਹੈ। ਇਹ ਫੈਕਟਰੀ ਯੂਕਰੇਨ ਦੀ ਸਰਹੱਦ ਤੋਂ 1,400 ਕਿਲੋਮੀਟਰ ਤੋਂ ਵੱਧ ਦੂਰ ਸਥਿਤ ਹੈ।
ਮਾਸਕੋ: ਰੂਸ ਦੀ ਸਰਕਾਰੀ ਸਮਾਚਾਰ ਏਜੰਸੀ ਆਰ ਆਈ ਏ ਨੇ ਅੱਜ ਰੂਸੀ ਰੱਖਿਆ ਮੰਤਰਾਲੇ ਦੇ ਹਵਾਲੇ ਨਾਲ ਦੱਸਿਆ ਕਿ ਰੂਸੀ ਫੌਜਾਂ ਨੇ ਯੂਕਰੇਨ ਦੇ ਪੂਰਬੀ ਦੋਨੇਤਸਕ ਖੇਤਰ ਵਿੱਚ ਕਾਰਪਿਵਕਾ ਪਿੰਡ ’ਤੇ ਕਬਜ਼ਾ ਕਰ ਲਿਆ ਹੈ। ਇੱਕ ਹੋਰ ਖ਼ਬਰ ਵਿੱਚ, ਤਾਸ ਖ਼ਬਰ ਏਜੰਸੀ ਨੇ ਦੱਸਿਆ ਕਿ ਯੂਕਰੇਨੀ ਡਰੋਨਾਂ ਨੇ ਰੂਸ ਦੇ ਤਾਤਾਰਸਤਾਨ ਖੇਤਰ ਦੇ ਅਲਮੇਤਯੇਵਸਕ ਵਿੱਚ ਉਤਪਾਦਨ ਇਕਾਈਆਂ ’ਤੇ ਹਮਲਾ ਕਰਨ ਦੀ ਕੋਸ਼ਿਸ਼ ਕੀਤੀ। -ਰਾਇਟਰਜ਼
