ਸਾਲ 2025 ਵਿੱਚ ਭਾਰਤੀ ਦੁਨੀਆ ਭਰ ਵਿੱਚ ਸ਼ੈਂਗੇਨ ਵੀਜ਼ਾ ਲਈ ਅਪਲਾਈ ਕਰਨ ਵਾਲੇ ਤੀਜੇ ਸਭ ਤੋਂ ਵੱਡੇ ਸਮੂਹ ਵਜੋਂ ਉਭਰੇ ਹਨ। ਯੂਰਪੀਅਨ ਕਮਿਸ਼ਨ (EC) ਦੇ ਅੰਕੜਿਆਂ ਅਨੁਸਾਰ, 11.5 ਲੱਖ ਭਾਰਤੀਆਂ ਨੇ ਸ਼ੈਂਗੇਨ ਵੀਜ਼ਾ ਲਈ ਅਰਜ਼ੀਆਂ ਦਿੱਤੀਆਂ, ਜਿਨ੍ਹਾਂ ਵਿੱਚੋਂ 15.8% ਅਰਜ਼ੀਆਂ ਰੱਦ (Reject) ਹੋ ਗਈਆਂ। ਚੀਨੀ ਨਾਗਰਿਕਾਂ ਨੇ 18 ਲੱਖ ਅਰਜ਼ੀਆਂ ਦੇ ਨਾਲ ਪਹਿਲਾ ਸਥਾਨ ਬਰਕਰਾਰ ਰੱਖਿਆ, ਜਿਨ੍ਹਾਂ ਦੀ ਰਿਜੈਕਸ਼ਨ ਦਰ ਮਹਿਜ਼ 4.1% ਰਹੀ। ਤੁਰਕੀ ਤੋਂ 12.5 ਲੱਖ ਬਿਨੈਕਾਰਾਂ ਨੇ ਅਪਲਾਈ ਕੀਤਾ। ਰੂਸ (6.8 ਲੱਖ) ਅਤੇ ਮੋਰੱਕੋ (6.2 ਲੱਖ) ਚੌਥੇ ਅਤੇ ਪੰਜਵੇਂ ਨੰਬਰ ‘ਤੇ ਰਹੇ। EC ਨੇ ਕਿਹਾ ਕਿ ਚੋਟੀ ਦੇ ਪੰਜ ਬਿਨੈਕਾਰ ਦੇਸ਼ਾਂ ਦੀ ਸੂਚੀ ਵਿੱਚ ਜ਼ਿਆਦਾਤਰ ਕੋਈ ਬਦਲਾਅ ਨਹੀਂ ਹੋਇਆ।
ਮਹਿੰਗਾਈ ਦੇ ਬਾਵਜੂਦ ਵਧੀਆਂ ਅਰਜ਼ੀਆਂ
ਹਵਾਈ ਕਿਰਾਏ ਵਿੱਚ ਭਾਰੀ ਵਾਧੇ ਤੇ ਰੁਪਏ ਦੀ ਗਿਰਾਵਟ ਕਾਰਨ ਵਿਦੇਸ਼ ਯਾਤਰਾ ਮਹਿੰਗੀ ਹੋਣ ਦੇ ਬਾਵਜੂਦ, 2025 ਵਿੱਚ 2024 ਦੀ ਤੁਲਨਾ ਵਿੱਚ 4% ਵੱਧ ਭਾਰਤੀਆਂ ਨੇ ਸ਼ੈਂਗੇਨ ਵੀਜ਼ਾ ਲਈ ਅਪਲਾਈ ਕੀਤਾ। ਵੀਜ਼ਾ ਰੱਦ ਹੋਣ ਦੀ ਦਰ ਵੀ 15% ਤੋਂ ਵਧ ਕੇ 15.8% ਹੋ ਗਈ ਹੈ।
ਸਵਿਟਜ਼ਰਲੈਂਡ ਅਤੇ ਫਰਾਂਸ ਮਨਪਸੰਦ
ਭਾਰਤ ਤੋਂ ਸ਼ੈਂਗੇਨ ਵੀਜ਼ਾ ਅਰਜ਼ੀਆਂ ਵਿੱਚ ਸਵਿਟਜ਼ਰਲੈਂਡ ਸਭ ਤੋਂ ਅੱਗੇ ਰਿਹਾ, ਜਿੱਥੇ ਲਗਭਗ 2.3 ਲੱਖ ਅਰਜ਼ੀਆਂ ਆਈਆਂ। ਫਰਾਂਸ ਵਿੱਚ 2 ਲੱਖ ਤੋਂ ਵੱਧ, ਜਰਮਨੀ ਵਿੱਚ 1.5 ਲੱਖ, ਨੀਦਰਲੈਂਡ ਵਿੱਚ ਕਰੀਬ 1 ਲੱਖ ਅਤੇ ਸਪੇਨ ਵਿੱਚ 91,000 ਅਰਜ਼ੀਆਂ ਪ੍ਰਾਪਤ ਹੋਈਆਂ। ਸਵਿਟਜ਼ਰਲੈਂਡ ਅਤੇ ਫਰਾਂਸ ਵਿੱਚ ਵੀਜ਼ਾ ਪ੍ਰਕਿਰਿਆ ਤੇਜ਼ ਹੈ, ਜਿੱਥੇ 7-10 ਦਿਨਾਂ ਵਿੱਚ ਪਾਸਪੋਰਟ ਵਾਪਸ ਮਿਲ ਜਾਂਦਾ ਹੈ।
3.3 ਕਰੋੜ ਭਾਰਤੀਆਂ ਨੇ ਕੀਤੀ ਵਿਦੇਸ਼ ਯਾਤਰਾ
2025 ਵਿੱਚ ਕੁੱਲ 33 ਮਿਲੀਅਨ ਭਾਰਤੀਆਂ ਨੇ ਵਿਦੇਸ਼ ਯਾਤਰਾ ਕੀਤੀ, ਜੋ ਕਿ 2024 ਤੋਂ 6% ਅਤੇ 2019 ਤੋਂ 21.5% ਵੱਧ ਹੈ। ਇਨ੍ਹਾਂ ਵਿੱਚ ਯੂਏਈ (8.6 ਮਿਲੀਅਨ), ਸਾਊਦੀ ਅਰਬ (3.4 ਮਿਲੀਅਨ), ਥਾਈਲੈਂਡ (2.2 ਮਿਲੀਅਨ), ਅਮਰੀਕਾ (2 ਮਿਲੀਅਨ), ਅਤੇ ਸਿੰਗਾਪੁਰ (1.5 ਮਿਲੀਅਨ) ਸ਼ਾਮਲ ਹਨ। ਵਿਸ਼ਵ ਪੱਧਰ ‘ਤੇ, ਸ਼ੈਂਗੇਨ ਖੇਤਰ ਨੂੰ 12 ਮਿਲੀਅਨ ਛੋਟੀ ਮਿਆਦ ਦੇ ਵੀਜ਼ਾ ਅਰਜ਼ੀਆਂ ਪ੍ਰਾਪਤ ਹੋਈਆਂ, ਜਿਨ੍ਹਾਂ ਵਿੱਚੋਂ 10 ਮਿਲੀਅਨ ਤੋਂ ਵੱਧ ਵੀਜ਼ੇ ਜਾਰੀ ਕੀਤੇ ਗਏ ਸਨ।
ਕੀ ਹੁੰਦਾ ਹੈ ਸ਼ੈਂਗੇਨ ਵੀਜ਼ਾ?
ਸ਼ੈਂਗੇਨ ਵੀਜ਼ਾ ਯੂਰਪ ਦੇ 29 ਦੇਸ਼ਾਂ ਦਾ ਇੱਕ ਸਾਂਝਾ ਵੀਜ਼ਾ ਹੈ। ਇਸ ਨੂੰ ਪ੍ਰਾਪਤ ਕਰਨ ਤੋਂ ਬਾਅਦ ਤੁਹਾਨੂੰ ਹਰ ਯੂਰਪੀਅਨ ਦੇਸ਼ ਲਈ ਵੱਖਰੇ ਤੌਰ ‘ਤੇ ਵੀਜ਼ਾ ਨਹੀਂ ਲੈਣਾ ਪੈਂਦਾ ਅਤੇ ਤੁਸੀਂ ਬਿਨਾਂ ਕਿਸੇ ਸਰਹੱਦੀ ਜਾਂਚ ਦੇ ਇਨ੍ਹਾਂ ਸਾਰੇ ਦੇਸ਼ਾਂ ਵਿੱਚ ਆਸਾਨੀ ਨਾਲ ਯਾਤਰਾ ਕਰ ਸਕਦੇ ਹੋ।
