ਆਸਟ੍ਰੇਲੀਆ ਦੀ ਨੈਸ਼ਨਲ ਏਅਰਲਾਈਨ ਕਵਾਂਟਾਸ ਆਪਣੇ ਸਾਰੇ ਏਅਰਬੱਸ ਏ 380 ਸੁਪਰਜੰਬੋ ਜਹਾਜ਼ਾਂ ਨੂੰ ਰਿਟਾਇਰ ਕਰਨ ਦੀ ਤਿਆਰੀ ਕਰ ਰਹੀ ਹੈ। ਇੰਟਰਨੈੱਟ ਮੀਡੀਆ ਰਿਪੋਰਟ ਮੁਤਾਬਕ, ਏਅਰਲਾਈਨ ਨੇ ਕਿਹਾ ਸੀ ਕਿ ਉਹ 2028 ’ਚ ਆਪਣੇ 10 ਏ 380 ਜਹਾਜ਼ਾਂ ਨੂੰ ਰਿਟਾਇਰ ਕਰਨਾ ਸ਼ੁਰੂ ਕਰ ਦੇਵੇਗੀ। ਇਹ ਸਮਾਂ ਪਹਿਲਾਂ ਤੈਅ ਕੀਤੇ ਗਏ ਸਮੇਂ ਤੋਂ ਚਾਰ ਸਾਲ ਪਹਿਲਾਂ ਹੈ। ਅਜਿਹਾ ਮੈਂਟੇਨੈਂਸ ਤੇ ਫਿਊਲ ਦੀ ਵਧਦੀ ਲਾਗਤ ਕਾਰਨ ਕੀਤਾ ਜਾ ਰਿਹਾ ਹੈ। ਇਹ ਚਿੰਤਾ ਦੂਜੀ ਏਅਰਲਾਈਨ ਵੀ ਜਤਾਉਂਦੀ ਰਹੀ ਹੈ, ਜੋ ਹੁਣ ਵੀ ਇਨ੍ਹਾਂ ਵਿਸ਼ਾਲ ਜਹਾਜ਼ਾਂ ਦੀ ਵਰਤੋਂ ਕਰ ਰਹੀ ਹੈ।
ਕਵਾਂਟਾਸ ਦੇ ਏ380 ਨੂੰ ਲੈ ਕੇ ਕੀਤਾ ਗਿਆ ਫੈਸਲਾ ਸੁਪਰਜੰਬੋ ਜੈੱਟ ਦੇ ਲਈ ਇਕ ਹੋਰ ਵੱਡਾ ਝਟਕਾ ਹੈ। ਐਵੀਏਸ਼ਨ ਐਨਾਲਿਟਿਕਸ ਫਰਮ ਸਿਰਿਆਮ ਦੇ ਡਾਟਾ ਮੁਤਾਬਕ ਅੱਜ ਸਿਰਫ 171 ਜਹਾਜ਼ ਹੀ ਸਰਵਿਸ ਦੇ ਰਹੇ ਹਨ। ਆਰਡਰ ਮਿਲਣਾ ਬੰਦ ਹੋਣ ਤੋਂ ਬਾਅਦ ਏਅਰਬੱਸ ਨੇ 2021 ’ਚ ਇਸ ਦਾ ਪ੍ਰੋਡਕਸ਼ਨ ਰੋਕ ਦਿੱਤਾ ਸੀ। ਇਹ ਇਸ ਗੱਲ ਦਾ ਸੰਕੇਤ ਹੈ ਕਿ ਲਗਜ਼ਰੀ ਐਵੀਏਸ਼ਨ ਦੀ ਦੁਨੀਆ ਕਿਵੇਂ ਬਦਲ ਰਹੀ ਹੈ। ਜਦੋਂ ਏ380 ਲਾਂਚ ਹੋਇਆ ਸੀ ਤਾਂ ਪੱਛਮੀ ਏਸ਼ੀਆ ਦੀ ਨਵੀਂ ਏਅਰਲਾਈਨ ਨੇ ਇਸ ਦੇ ਸਟੇਟਸ ਦਾ ਫਾਇਦਾ ਚੁੱਕ ਕੇ ਐਗਜ਼ੀਕਿਊਸ਼ਨ ਟ੍ਰੈਵਲ ਮਾਰਕੀਟ ਦਾ ਇਕ ਵੱਡਾ ਹਿੱਸਾ ਹਾਸਲ ਕਰ ਲਿਆ ਸੀ।
