ਵਾਸ਼ਿੰਗਟਨ: ਅਮਰੀਕਾ ਵਿੱਚ Medicare ਹੈਲਥਕੇਅਰ ਸਕੀਮ ਨਾਲ ਜੁੜੀ ਕਥਿਤ ਵੱਡੀ ਧੋਖਾਧੜੀ ਦੇ ਮਾਮਲੇ ਵਿੱਚ ਭਾਰਤੀ ਮੂਲ ਦੇ ਇੱਕ ਵਿਅਕਤੀ ਨੂੰ ਭਗੌੜਾ ਘੋਸ਼ਿਤ ਕੀਤਾ ਗਿਆ ਹੈ। ਉਸ ’ਤੇ ਜੈਨੇਟਿਕ ਟੈਸਟਾਂ ਲਈ ਝੂਠੇ ਕਲੇਮ ਦਾਖਲ ਕਰਕੇ Medicare ਤੋਂ ਕਰੀਬ 93 ਮਿਲੀਅਨ ਅਮਰੀਕੀ ਡਾਲਰ ਦੀ ਧੋਖਾਧੜੀ ਕਰਨ ਦੇ ਦੋਸ਼ ਹਨ। ਅਮਰੀਕੀ ਸਿਹਤ ਵਿਭਾਗ ਮੁਤਾਬਕ, ਮੰਨਿਆ ਜਾ ਰਿਹਾ ਹੈ ਕਿ ਮੁਲਜ਼ਮ ਖਦੀਰ ਖਾਨ ਮੁਹੰਮਦ ਇਸ ਸਮੇਂ ਭਾਰਤ ਦੇ ਹੈਦਰਾਬਾਦ ਵਿੱਚ ਹੋ ਸਕਦਾ ਹੈ।
ਡਾਕਟਰਾਂ ਦੀ ਜਾਣਕਾਰੀ ਦੀ ਕਥਿਤ ਤੌਰ ’ਤੇ ਕੀਤੀ ਵਰਤੋਂ
ਸਿਹਤ ਵਿਭਾਗ ਨੇ ਦੱਸਿਆ ਕਿ ਖਦੀਰ ਖਾਨ ਮੁਹੰਮਦ ਨੇ ਅਗਸਤ 2023 ਤੋਂ ਅਕਤੂਬਰ 2024 ਦਰਮਿਆਨ ਡਾਕਟਰਾਂ ਦੀ ਨਿੱਜੀ ਪਛਾਣ ਸਬੰਧੀ ਜਾਣਕਾਰੀ ਦੀ ਕਥਿਤ ਤੌਰ ’ਤੇ ਉਨ੍ਹਾਂ ਦੀ ਜਾਣਕਾਰੀ ਜਾਂ ਸਹਿਮਤੀ ਤੋਂ ਬਿਨਾਂ ਵਰਤੋਂ ਕੀਤੀ।
ਦੋਸ਼ ਹੈ ਕਿ ਇਸ ਜਾਣਕਾਰੀ ਦੀ ਵਰਤੋਂ ਕਰਕੇ ਖੁਦ ਜਾਂ ਹੋਰ ਲੋਕਾਂ ਰਾਹੀਂ Medicare ਕੋਲ ਕਲੇਮ ਦਾਖਲ ਕਰਵਾਏ ਗਏ। ਇਨ੍ਹਾਂ ਕਲੇਮਾਂ ਵਿੱਚ ਅਜਿਹੇ ਲਾਭਪਾਤਰੀਆਂ ਦੇ ਜੈਨੇਟਿਕ ਟੈਸਟ ਸ਼ਾਮਲ ਸਨ, ਜਿਨ੍ਹਾਂ ਦਾ ਸਬੰਧ ਉਨ੍ਹਾਂ ਡਾਕਟਰਾਂ ਨਾਲ ਇਲਾਜ ਦੇ ਮਾਮਲੇ ਵਿੱਚ ਨਹੀਂ ਸੀ।
93 ਮਿਲੀਅਨ ਡਾਲਰ ਦੇ ਫਰਜ਼ੀ ਕਲੇਮ
ਸਿਹਤ ਵਿਭਾਗ ਦੇ ਅਨੁਸਾਰ, ਕਥਿਤ ਧੋਖਾਧੜੀ ਦੌਰਾਨ ਮੁਹੰਮਦ ਨੇ ਕਰੀਬ 93 ਮਿਲੀਅਨ ਅਮਰੀਕੀ ਡਾਲਰ ਦੇ ਫਰਜ਼ੀ Medicare ਕਲੇਮ ਜਮ੍ਹਾਂ ਕਰਵਾਏ। ਇਨ੍ਹਾਂ ਵਿੱਚੋਂ ਲਗਪਗ 65 ਮਿਲੀਅਨ ਡਾਲਰ ਦਾ ਭੁਗਤਾਨ ਵੀ ਕੀਤਾ ਗਿਆ। ਵਿਭਾਗ ਮੁਤਾਬਕ ਸਿਰਫ਼ ਸਾਲ 2023 ਵਿੱਚ 10 ਦਿਨਾਂ ਦੀ ਇੱਕ ਮਿਆਦ ਦੌਰਾਨ Medicare ਵੱਲੋਂ ਇਨ੍ਹਾਂ ਕਲੇਮਾਂ ਦੇ ਬਦਲੇ ਕਰੀਬ 13 ਮਿਲੀਅਨ ਡਾਲਰ ਦਾ ਭੁਗਤਾਨ ਕੀਤਾ ਗਿਆ।
